Rev. David Lah le a hawipa U Win Htun cu August 6, 2020 ah Biaceih zung nih Thla (3) chung Thongthlak ding in biachahnak an tuah piak cang hna. Rev. David Lah le a hawipa cu Kawlram nih Covid-19 zulhphung an ser mi zeirel loin an um, an buar ti ruang ah Natural Disaster Management Law timi act 25 in taza an cuai hna. Caan saupi Biaceih zung nih an kong a ceih hnu ah nihin ah biachahnak an tuah piak hna hi asi.

Taza an cuainak mi hna cu Natural Disaster Management Law Act (25) a si. Asinain biachahnak an tuah piak tikah hna ahcun an case a thleng deuh cang ti nak a si, Act-30(a) in biachahnak an tuah piak hna i Thla(3) chung Thongthlak ding ti asi.

“David La le a hawipa cu Natural Disaster Management Law Act 25 in taza cuai an si ko. Asinain biachahnak tu cu Act-30(a) in an tuah piak hna. Thla (3) chung thongthlak ding ti an si ko nain Thonginn chung ah thla(2) leng hren an si cang ruang ah a saupi thlak chap an si ti lai lo. A tambik ah zarh 2 hrawng lawng Thonginn ah an um cang lai” tiah David Lah a Sihni nih a chim hi asi.

Taza an cuai nak mi hna pohmah le Biachahnak an tuah piak mi hna pohmah zoh tikah Pathian nih a dirpi hna timi a langh lawng si loin, nihin tiang Thonginn an umnak ah dam tein an um hi Pathian dawtnak a si.Dam tein Thonginn in luatnak an hmuh i Pathian rianṭuantu ṭha a sinak a thar in a langh ṭhannak lai thlacam bawm hna usih. Chirhchan: V.OM. Journal