Covid-19 zawtnak nih vawleipi a buai cuahmah lio le ram uktu cheukhat lungreithei vansang in an um lioah North Korea nih cun hi zawtnak lak in an ram a him rih nak kong ral ṭha ngaiin a chim diam ko ai.

North Korea Central Emergency Anti-epidemic department director, Pak Myong Su nih cun tukum January thla ahkhan China ramah Coronavirus zawtnak hmuh a si tiah an phuan cang kain an ramri an phih/khar colh i “phikharhnak fak deuh in kal pi ding,” tiah a chim i atu tiangah hin an ram chungah zawtnak hrik a ngeimi pakhat hmanh an um rih lo tiah a chim.

North Korea Central Emergency Anti-epidemic department director, Pak Myong Su nih a chim rihmi cu “ Ramri kan khar i ti lawng lei le cunglei in i pehtlaihnak zong kan phih khar dih i kan ramchung ah a rak lutmi cu kharkhumh/hrin hna in ṭha tein checknak kan tuah hnuah an thilri vialte zong sii in thianhpiak dih an si,” tiah a chim.

Cu lio ah cun mitampi nih North Korea biachimmi a zum lomi zong an rak um ve i South Korea i US Military Commander General Robert Abrams zong nih North Korea ah Coronavirus a ngeimi an hrimhrim lai tiah a ruahnak a rak chim bal cang. Asinain North Korea lei nih kan ramchung ah Coronavirus zawtnak ngeimi pakhat an um lo tiah a chim ve.