US Covid-19 Update: 04/17/2020. Tuchun tiangah US ah a thimi, minung 34705 an phan. Nizan ah minung 6125 an thi. A zawmi 644823 an phan. Nizan lawngah a zawmi minung 34939 an i chap cang. Nikhat hnu nikhat a zawmi an zor cang. Tutiang ah zawtnak a chek cangmi 3 million renglo an si cang. A dam thanmi 58024 an si. Nizan lawgah a dam thanmi minung 9314 an i chap ve. New York khua pakhat lawngah minung 16106 an thi cang. Nizan lawngah New York i a thimmi, 4520 an si. New York khua a thimi hi coronavirus in a thi lomi zong an rel chih hna tiah thawngpang a chuak len. US um Chin miphun chung in a thimi pahnih an um. Washington D.C Area ummi Tedim lei kan uanau pakhat le Michigan state Battle Creek ummi Falam lei kan unau an si.

President Trump nih cozah le business pawl onnak nawl cu anmah le state cio nawl a pek hna. State Governor hna nih an duh ahcun phase one cu tuchun thawk in on khawh colh a si ko tiah a chim. Asinain state pakhat le pakhat ah zawtnak a faak deuhmi le a din deuhmi a um caah an on caan ikhah dawh a si lo. Asinain state pakhat le pakhat a neihniam mi pawl cu hmun khat ah on ti dawh an si. Hawi hlan bik ah a ong dingmi state cu 29 hrawng si dawh an si. Michigan, Ohio, Wisconsin, Minnesota, Illinois, Indiana le Kentucky hi hmun khat ah on an timh. New York, New Jersey, Connecticut, Pennsylvania, Delaware, Rhode Island le Massachusetts hi hmun khat teah on an timh ve.

White house taskforce hna nih nizan press conference ah US ram pumpi on thannak dingah guideline an tuahmi vialte an thanh cang. US on thannak ah a herhmi recsource vialte cu federal cozah nih phase one, phase two le phase three tiah an then piak hna. Phase one hi cu a thlengmi tlawmpal te lawng a si. Phase Two le Phase Three hi a biapi ngaimi an hung si. Phase one ah minung 10 tiang i pumh khawh a si lai i, gyms pawl zong on khawh a si lai.

Phase two ah hin minung 50 tang i pumh khawhnak le sianginn, restaurent, bar, daycare le camps pawl on khawhnak a tel lai ti a si. Sport zong zeimawzet cu i celh khawh a si lai. Phase Three ah hin zalong tein riantuan khawh a si lai. Sizung zong on than a si lai i, mizaw zoh zong a ngah lai. Zalong deuh in khual zong tlawn khawh a si te lai. Asinain Social distancing hi cu a um pah rih lai.

Nizan ah President Donald Trump le ramthangcho bik ram 7 teleconference meting an tuah i, US nih WHO bawmhnak a phihmi cu an lungtling. Tuluk cozah nih thuh nawhmi ngei lo tein coronavirus a thawnak finghlang tein a phuan a hau tiah an chim. Japan nih Tuluk ram i auto motors senak sehzung pawl cu Japan ram ah kan kirter hna lai tiah an ti. Japan nih kanmah ram teah kan herhmi kan chuahve a hau cang tiah an chim. Credit: Salai Lairamthang