Zualko: Rev. Lian Mang nih mual a kan liam taak ruangmang ee. Kalay peng, Cicai Baptist Khrihfabu i Pastor Rev. Lian Mang kum 65 nih tunchun suimilam 2 hrawngah Kalay Royal sizungah mual a kan liam taak tiah thawng kan theih.

Amah hi lunglei dam lonak a ngei ciami a si i Malaysia ah kum fatin tein aa thlopbul i a zohkhenh tawnmi a si i nain tu kum cu Covid ruangah kal kho loin an um hi a si.

Tuni zongah Thlaithar puai ah Pathian thawngtha a chim ko. Cun, amah tein motor zong a cit mawng kho ko.

Rev. Lian Mang hi ramchung le ramleng Baptist phu a simi CBU(Chin Baptist Union) ah term khat chung hruaitu a rak tuan cang mi a si. Bia le hla lei zongah bochan tlak tukmi a si. Atu bantukin mual a kan liam taak hi cu ngaih a chia tuk hringhran. Tantaakmi Chungkhar Bawipa nih hnem hram ko hna seh! Chirhchan: Zalen

Thawngpang dang rak rel chih:Hakha-Thantlang Kar Ah Mi Pathum Nih Phaisa Sing 17 Chuhnak A Chuak. Chin ramkulh Hakha le Thantlang kar ah January 16 (nizaan) ahkhan Minung pathum nih khualtlawng pakhat phaisa sing 17 an chuh tiah theih a si.

Thil a can ning cu Kum 32 a simi U Aung Aung cu Hakha lei ah leiba cham a kal a kir lei ah Thantlang lei meng 9 a hlatnak zawn ah min hngalh lo mi pathum nih an kham i phaisa sing 17 an chuh tiah theih a si.  Cycle in lam an kham i, an ṭumter hnu ah pakhat nih a hngawng in a kuh. Pakhat nih nam in a hnulei in a cer i, lolam lei ah an kalpi. Furlong pahnih hrawng an kalpi hnu ah an ṭhutter i, a kut pahnih cu plastic tap in an ṭem i a ka zong plastic tap in an huh hnu ah a phaisa sing 17 an chuh tiah Thantlang  palik nih an chim.

<

Hi thilchut tu misual pathum hna cu kawl cuahmah an si i, Thantlang palik zung nih biacaihphung 392 in case an hun hnu ah an kawl cuahmah lio hna a si. Source – IRDP Thantlang (Chin Broadcasting Network)