Palaw Peng Ah SAC Ralkap Nih Ralhrial Chungkhar Pakhat (Milu 4) An Thah Hna. Tanintharyi ramṭhen, Meik pengkomh, Palaw peng um Letku khua ah ralhrial chungkhar pakhat, chungkhar milu 4 cu SAC ralkap nih an thah hna, tiah tualchung mi hna sinin theih a si.

Nizan September 17 zanlei ah Letku khuami ralhrial chungkhar hna cu khua in an zaam i, an zaam ni zanlei ah khua ah kir ṭhan in, SAC ralkap he lam ah an i tong i meithal in an kah hna, tiah Western News nih a ṭial.

Min langhter a duh lomi Letku khuami ralhrial pakhat nih cun, “Annih chungkhar hi ral an hrialnak in an kir i ruah lo piin SAC ralkap he an i ton caah an kah thah hna,” tiah Western News ah a chim.

SAC kutin a thi mi hna cu Bah Kyin(kum 69), Bah Kyin fapa Ngwe Soe(kum 40), a fanu Thanda Nwe(kum 37) le a tunu Ye Win(kum 40) hna an si. An ruak cu an khua nichuahlei ah an chiah hna i SAC ralkap pawl an kir hnu ah khuami nih kan laak hna, tiah min langhter a duh lomi Letku khuami pakhat nih Western News ah a chim.

SAC ralkap nih Palaw peng, Letku khuakomh ah ti lam le tlang lam in rallam an sial tawn i tualchung mi hna zong an thah hna. Zarhkhat chung ah tualchung mi 5 an thah cang hna. Nizan September 17 rallam an sial lio zong ah Letku khua inn 5 zong an khangh.

Palaw peng, Letku khuakomh khuate 6 in minung 1,000 leng cu ralhrial in an zaam i SAC ralkap nih an tlaihmi hna zong an um leng ah inn 20 tluk an khangh, tiah theih a si.