Ngaihchiat hrawmpi cio hna u sih. Vawlei mipi a kan that cuahmahtu coronavirus in Mizo doctor pakhat cu a nunnak a liam tiah theih a si. Tuan deuh ah cun zunthlum a ngeih ruang ah a rak i thlop. A sinain kan hnu 13 April 2020 zanlei ah khan Covid-19 a ngei tiah hmuhchuah a si. Hi bantuk in Covid-19 a ngei ti theih a si hnu ah hin a dirhmun ṭhatlo lei a panh chin lengmang i nizan zinglei ah khan a nunnak a liam tiah an thanh.

Covid-19 ruang ah Dr. John L Sailo kum 69 cu nizan zinglei suimilam 2:30 ah khan a nunnak thaw a dih cang tiah Shillong lei in theih a si. Dr John Sailo hi Shillong le Nongpoh ah Bethany Hospital a dirhtu le a ngeitu a si. A pa cu Capt. Lalrinthanga Sailo (L) a si i a nu cu Diki Sailo (L) a si. A mah hi MBBS, MD (AIIMS), FCCP a si i Bethany Hospital ah Director & Consutant Internal Medicine rian a ttuanmi a si. An chungkhar in Shillong khuapi Nongrim Hills ah khua a sami an si. Ref: Vanglaini

Chap: Hi bantuk in kan miphun hawi a simi Mizo Dr. John L Sailo nih coronavirus ruang ah mual a kan liam taak ti thawng theih cu ngaihchia ngaingai a si. Taak taakmi chungkhar nan ngaihchiatnak le nan tuarnak kan in hrawmpi hna. Pathian tu nih nan mitthli in hnawh piak hna in nan thinlung ah daihnak lenter ko seh. RIP.