Nulepa ulenau hna, Indiana Chin Baptist Church chungtel a simi Pu Biak Ceu (kum 64) nih takpum damlonak in nihin (January 10, 2021) zanlei 2:30pm hrawng ah a sertu Pathian sin ah zungzal ca in a kan dinhtaak. A nupi Pi Men Tluai le fapa pathum a rohtaak hna.

A chuahpi a ulenau hna cu Sayakyi Van Awi (tleicia), Rev. Hlawn Tial (tleicia), Sayama Karen Louis (USA), Sayama Hniang Nawn (Hakha), Rev. Lawm Bik (Japan), Pu Thawng To (tleicia), Pi Iang Khun (Hakha), le Lily (Hakha) hna an si. Ram le miphun ca ah nun thaap in CNF/A ah a rak lut i kum saupi ralbawi rian tiang a rak ttuanmi a si.

A luancia kum 2 hrawng in damlonak (thin le cuap cancer) nih a tlak i, siibawi te le chungkhar nih a tthabik in an conghhramh ko nain dam lei panh ti lo in a tu ah takpum in a kan tthen hi a si. Taantaakmi chungkhar le rualchan cingla ca ah thlacam rak kan bawm cio u. Ruak-thlah-nak ni le caan zeihmanh a fiang kho rih lo. A fian tik in thawng kan thanh tthan te lai. Zuunngaih Par cah a duhmi Rev. Hrang Cung Hnin (317-986-0760) sin ah thawngthanh khawh a si lai. Ngaihchiatpi buin, Pastor Lal Cung Awi (Indiana Chin Baptist Church)

Update news: Hakha Khuathar ah heater mei in inn thum a kaang, inn hlangtu U Than Wai a kanghchih. 2021 January 9 zaan 11:00 hrawng ah heater (electric meitohnak) in aa thok i inn thum a kaang, innhlangtu Seven Star kedan dawr ngeitu, Kala miphun U Than Wai a kanghchih, tiah kan theih. Hi inn thum a kaang mi ah hin inn 2 cu Pu Kio Ling inn a si i inn khat cu Pu Hniang Hmung inn a si. Caanphio in sak mi inn a si, tiah kan theih.

“Zaan 11:00 hrawng ah zeitin mei aa thok ti hngalh loin a kaang i Meithat Zung motor nih suimilaam 12:30 hrawng ah an hmih khawh. A thi mi pa hi Seven Star kedan dawr ngeitu a si i a nupi le fale cu Thantlang an tlawn lio a si. An inn ah hin kedan pawl chiahnak kudawng zong an ngei. A ruak hi mei an hmih khawh hnu lawng ah kan hmuh,” tiah inn ngeitu Pu Kio Ling upa Pu Ngun Ling nih The Hakha Times ah a chim.

Hi kong ah Hakha Peng Meithat Zung lutlai Pu Thian Nuam Maung nih, “Inn cu ciam dih ko. Inn kangh aa thoknak hi heater ti mi electric meitohnak in aa thok mi a si. Thilri a ciam mi hi kanmah nih a tlangpi in kan tuak ning ahcun tangka Ks. 924,000 hrawng a si. Meithat motor 3, ti phur motor 2, Penguk Zung motor 2 le Ambulance 1 tiin kan zuanhnawh,” tiah The Hakha Times ah a chim.

Inn thum a kaang mi chung ah hin inn khat cu a lawng mi a si. Inn khat ah chungkhar 7 an um nain an chuak manh. U Than Wai tu cu mei an hmih khawh dih hnu lawng ah a ruak an hmuh. 2021 kum ah tutan inn kaang hi Hakha khuachung ah a voi khatnak a si, tiah kan theih. Biakilh: Credit pe loin copy paste kan sianglo. Source: The Hakha Times

____

Copyright © Chin World News Evening