Zualko: A Poi Hringhran Ko Ee Hakhalay Khua In Missionary Rian A Kan Ṭuanpiaktu Rev.Salai Sui Din Mang Nih Mual A Kan Liam Taak

Thawngpang

A Poi A Poi Hringhra Ko Ee Hakhalay Khua In Missionary Rian A Kan Ttuanpiaktu Rev.Salai Sui Din Mang Nih Mual A Kan Liam Taak

Zualko: A poi a poi hringhra ko e Hakhalay khua in Missionary rian a kan ttuanpiaktu Rev.Salai Sui Din Mang MaMang nih a rianttuannak hmun Salinci khua Sizungah tuzing ah mual a kan liam taak a poi hringhran ko. A tu an umnak hmunin a ruak zong tlunpi cuahmah a si i a dongtu hna zong tu zaanlei hi khua in an i thawh la Palee khua ah an i tong lai i zaanvar in rak tlunpi a si lai ruak vuitik caan le tream bel te kan chim kho rih loh .Taantakmi chungkhar hmunkip ummi caah thlaza campiak cio hna u sih.

A poi tuk e, hibantuk in Pathian rianttuan cuahmahmi nih atu bantuk mual a kan liam taakmi cu a pam tuk ee. Atu lio Laimi atu bantuk thawngpang theih ding aum pah lengmang. Naite ah Sayamah Jenny Van Lal Pek nih mual a kan liam taak hoi cang. Cun Malaysia ah Laipa Duh Cung Thang nih mual a kan liam taak tthan hoi atu le atu bantuk in ngaihchiatnak kan tong hoi, tantaak mi chungkhar Bawipa nih an ngaihchiatnak chungin hnem ko hna seh! Credit: Hlawnching Ceu Thawng

Hi cabia hi rak rel chih. Billy Graham nih a thih hlanah a ttialmi Pathian bia asi.

Biahaltu: Nihin ah kan tonmi buainak ah zeidah a nganbik a si tiah na ruah? Khrihfabu Bible kan cawnnak ah kan ceih lengmang ciomi a si i, ahohmanh kan ruahnak aa khat kho lo. Kan hmuh ning le kan ruahnak aa dang cio dih hna. Zeitin dah na ruah ve?

Rev. Billy Graham: Vawleicung ah kan tonmi buainak ah a nganbikmi cu ‘minung lungthin’ hi a si. Bible nih fiang tuk in a kan chimhmi cu ‘Lungthin hi zeizong vialte nakin a zer bik, Aho nih dah minung lungthin hi a hngalh khawh lai? Damh khawh ti lo tiangin a zaw cang’ a ti (Jer. 17:9). Kan buainak vialte hi kan lungthin in aa thokmi lawng an si. Ruat cio hmanh u law, kan i phorhlawtnak le kan i uahnak hi hlonh kho hna u sih law a tlingmi vawleicung ah kan um ko hna lai. Pakhat le pakhat karlak ah rualremnak tling kan ngei dih hna lai. Raltuk zong a um lai lo; rem lonak zong a um lai lo; uhtanhnak zong a um lai lo. Huatnak le hnahchuahnak vialte an lo dih lo.

Dawtnak le zaangfahnak le upatnak lawng tein kan khat dih hna lai i, Bible nih a kan kamhmi ‘Ram nih an vainam an la ti lai lo i, anmah le anmah an i doh ti lai lo; raltuknak caah raltuknak zong an cawng ti hna lai lo’ a timi vawleicung ah kan um hna lai (Isaiah 2:4). Sihmanhsehlaw vawlei ser hramthok kaa in kan lungthin ah hin tihnungmi hrawhhralnak he kan rak cawlcang cang. Zeitluk kan i zuam i, kan nunnak uk kan timh i, tlaih kan timh zong ah kan tlai i kan uk kho ti lo. Kan lungthin sualnak nih a kan uk i a kan mongh cang. Kan lungthin in a chuakmi sualnak dongh a thiam ti lo.

James nih cun ‘Nan i siknak le nan i velhnak vialte hi khuazei in dah an rat? Nuamhnak nan duhnak in an ra i, cu nan duhnak cu nan pum chungah khan anmah le anmah aa do lengmangmi an si lo maw?’ a kan ti (James 4:1). Cucaah nihin ah kan herh bikmi cu Pathian sinah mer i, kan sualnak i ngaihchih i, nunnak thar ngeih hi a si. Hihi a si kho maw? A si kho ko. Pathian nih a kan dawt tuk caah a Fapa Jesuh Khrih a kan pek. Vawleicung hi a tihnung tuk cang. Jesuh Khrih ah kan i mer i, Amah sinah kan nunnak kan pek ahcun a kan thlen lai i, a kan kamhmi daihnak a kan pek ko lai (John 14:27).

Leave a Reply