Rihkhawdar Kahdohnak Ah Ralzaam Pakhat A Thi, Pathum Hliam An Tuar! Chin ramkulh, Falam peng India-Myanmar ramri khua, Rihkhawhdar No.2 sang i Ṭio tiva kam tlangcung ah a ummi SAC ralkap le tualchung hriamtlaibu hna cu tuzing August 10, zinglei 5 in 8 tiang an i kap, tiah theih a si.

SAC Ralkap hna cu Rihkhawdar No.1 sang ah a ummi an hawile nih hriamngan in an bawmh peng hna i hriamngan kuan pakhat cu khuachung ah a tlak caah Kalaymyo in a rami ralzaam pakhat a thi i khuami dang pathum zong hliam an tuar, tiah theih a si. Rihkhawdar No.2 sang ah a ummi mizapi hna cu an dihlak ti awk in India lei kap ah an zaam dih i ramri hlei kam ah a ummi hna lawng an zaam lo, tiah theih a si. Credit: The Chin Post

Thawngpang dang: Sagaing ramṭhen, Depeyin peng ah January thla in August 8 tiang (thla 8 chung) ah SAC ralkap nih khua 30 an duah. Cu chung ah inn 700 hrawng cu a kaang i, minung 4000 hrawng cu bawmhchanh an herh ngai, tiah bawmchantu phu nih an thanh. Mukankyi khua cu inn 800 leng an umnak khua a si i, a luancia June thla ah inn 160 leng an kangh hnu ah a voi hnihnak an khangh ṭhan, tiah khuami nih an chim. SAC ralkap nih Mukankyi khua telh in khua 30 an khanghpiak hna caah, khuami 4000 reng lo cu eidin le hnipuan ah harnak an tong, tiah tualchung mi nih an chim.

“Khua 30 in inn 700 hrawng cu SAC ralkap nih an khangh i, Depeyin pengchung i rallam an sial poh ah khuachung inn khangh le hrawhhralnak an tuah lengmang. Depeyin pengchung sining cu a zualhma ngaingai, inn khanghpiak a tongmi hna cu rawl eiding le fenh-aih hnipuan an har ngai, bawmchantu phu cheukhat le NUG nih tlawmpal bawmhnak a pek nain, an i za lo,” tiah tualchung mi nih an chim.

Depeyin peng tualchung hriamtlai Ngyi Naung phu nih khua 17 ah inn chungkhar 346 cu inn khat ah kyats 30,000 cio bawmhnak an pek hna nain, bawmh an herh tuk rih, tiah a chimchap. SAC ralkap lei chimphuannak nawlngeitu general Zaw Min Htun nih cun, SAC ralkap nih inn an khangh tiah an chimmi cu sual puhnak men sawhsawh a si, a dikmi a si lo, tiah a chim.

Depeyin peng ah a luancia zarhkhat chung ahkhan SAC ralkap nih vanlei kahdohnak voi hnih tiang an tuah caah, tualchung mipi le hriamtlai phu ti in minung 10 an nunnak a liam, tiah khuami nih an chim. Data For Myanmar nih a thanh ning ah, SAC ralkap nih nawlngeihnak an lak thawk in May 31 tiang ah ramchung huap in inn 19,000 hrawng an khangh cang i, cu chung ah Sagaing ramṭhen ah inn 10,000 hrawng an khangh i, rampumpi in a tambik nak a si, tiah an langhter.

Kani Peng In Nikhat Chung Ah SAC Ralkap Cu Voi 3 Kah An Tong I, SAC Ralkap 16 An Thi: Kani pengchung ah rallam hmun thum in a sialtu SAC ralkap hna cu Kyauk Lung Gyi KLG brigade nih August 7 ah an rak kah hna. Cu kahdohnak ah cun SAC ralkap 16 an thi, tiah Kyauk Lung Gyi KLG brigade in ṭuanvo ngeitu nih media ah a chim.

“Zinglei suimilam 9:00 hrawng ah Kani in Alaykyun pyusawhti umnak khua ah riahcaw a phortu Leeng 17 cu kan kah hna. Cu hnu zaanlei suimilam 4:30 hrawng ah Pekhin khua le Kedaung khua kar um SAC ralkap tilawng cu kan kah ṭhan. Cu ni zaanlei suimilam 6:00 ah Kin khua pawng ralvengtu SAC ralkap zong kan kah ṭhan hna. SAC ralkap hna cu nikhat chung ah voi 3 tiang kan kah hna i, cu kahdohnak ah cun SAC ralkap 16 an thi,” tiah Kyauk Lung Gyi KLG brigade in ṭuanvo ngeitu nih a chim.