Salai J Van Duh Thar Lahnin|| 2020 Zing 5|| Aibur mino kum 14-18 kar ngakchia mino (9) cu Fangthen le Hnaring ah zu cawk an kal lio ah Leipi khuami Aa Kha, Hakha Leisen sang ah ummi (kum 34) le ahawi le hna cu Zing 4, 2020 chun ah an i velh hna i Aa Kha cu Hnaring siizung a phan tiah thawng kan theih.

Hi kongah Aa Kha a upa Saya Ling Din nih “A min ah “A Kha” tiah kan auh. Kan khua cu Leipi asi. Hakha Leisen sangah kan um. Bawipatlang Gate a tuahmi asi i Hakha le Hnaring a kalmi asi. A vuaktu hna he aa theimi an si lo i an i siknak zong a um balmi an si lo. Tlangval hna zu an rit le rit lo kong cu ka thei rih lo. Palang va ah an hawipa ti aa kholh lio motor cungin an hngak lio ah tlangval pawl an rak phan hna an ti.

“Vuak na ngamh maw kan i vuak lai an va ti i kan nih cu vuak hmang kan si lo a rak ti. Mah ti cun an i thawh than i Tisen (B) khua pawngah ka nau motor a rawk i an dirnak ah Hakha lei in kan tupa motor a rak phan i Hnaring ah khual kan va thlah ta lai tiah an i ti hna i Hnaring lei cu a va kir than ve. Tisen (B) le Fanthen kar Sentung lampial ah kan i din lai ta lai an ti i cuka cu dawr hmete a um rua. Mah ka cu tlangval pawl cu an rak um i motor cung an tum bak ah zei bia hmanh chim lo in an vuak hna hi asi,” tiah Chin World Evaning sinah a chim.

A chim chap ding ahcun velh a tongmi Aa Kha cu,“Hnaring siizung ah a um lio asi. Dathman thlak zong kan duh rih i Hakha siizung lei kalpi ding kan i ceih lio asi. Cun, an vuak hna lio ahhin motor mawngtu le a cuang vemi 2/3 zong an vuak chih hna nain hma an pu hna lo. Ka nau pa hi fak deuh in an vuak asi”tiah a chim chap.

“Hi kong he pehtlai in Saya Ling Din nih Zing 4,2020 nih amah pumpak facebook cahmaiah hitihin a taar “Kan nau pa (Aa Kha) velh a tawng. Nizan (September 4, 2020) niah ka nau pa cu Hnaring in Himual jeep in Hakha lei an i thawh. Sentung le Tisen B kar Palang va ah an hmai kalmi an hawipa ti aa kholh lio ah an hngak i motor chungah an thu ko. Culio ah tlangval pakua an rak phan i na ngamh maw kan i vua lai tiah an rak ti len.

“Kanmah cu cubantuk vuak hmangmi kan si lo tiah a va leh hna. Mah hnu cun an ithawh than i Tisen B pawngah an motor cu a rawk. Mah lio ah Hakha lei in a rami motor a rak phan i motor thilri lak dingah Hnaring lei a kalmi motor cu a zulh hna. An kal i Sentung lampial an phak ah motor cuangmi hna zun zun dingin an dir. Mah lampial ahcun kuak le tuktak an zuarnak a um rua.

“Tlangval hna cu mah ka cu an va um i ka nau motor cung a tum bakin an zuan hnawh a dang khual pawl zong an velh chih hna. Ka nau pa cu thlanglei a rak zam i an va dawi i an va velh. A hawile nihcun a zam kho i a luat tiah an va ruat i an rak velh len cu an rak hmuh lo. Cuti an velh hna lio ah Fanthen lei phone an chawnh hna i Fanthen mi an rak phak in motorcycle in an zam hna.

“Zingka an kalti mi an hawi an chawnh hna i Aibur an phak in an rak hngak hna i cu tlangval hna cu bia an hal i Leitak kan si tiah an rak hlen. Pakhatpa te angki ah thi ai neh caah a zum hna lo i Aibur khua upa hna a au hna i bawmh a hal hna tikah Aibur tlangval lawngte an rak si. (Tlangval hna min ka theih lo caah Aibur khuami ka ti hi asi i Aibur khuami dihlak ti duhnak asi lo)

“Ka nau pa cu Hnaring siizungah aa thlawp lio asi. A haa pahnih a kiak i a cal a kawi. FB hawile hna thlacam kan bawm ve u,” tiah a taar.

Hi kongah ramchung thawngzamhnak phu The Chinland Post nih Aa Kha bia an halnak tlamting ngaiin thil sining a chimmi hmuh khawh a si. Lautu khua upa le Aibur khua upa zong tonnak an ngei lai i zeitindah biachahnak an tuah te lai ti theih a si rih lo. Asinain velh a tongmi Aa Kha nih cun“Hnaring siizungah an ka chiah. Atu hi Aibur khua nupa zong an rak phan, Lautu khua upa zong an an tling, an rak phan. Upa pawl he cun an chim lai nain keimah cu Upadi ning tein tawlrel ka duhmi a si” tiah The Chinland Post nih biahalnak an tuahnak ah a chim.

Note: Aa Kha aa upa sinah thil sining fiang tein Chin World News Evaning nih kan hal hnuah, kan taar ṭhanmi a si. The Chinland Post ah tlamtling tein rel khawh a si lai. Cun, hi kan taarmi kongah thil sining hal duhmi nih, J Vanduhthar Lahnin Ah pehtlaih khawh asi.

The Chinland Post ah tlamtling rak rel!