Ziah hihi, CNF an men ti țung lo. (Ralkap thar derh duh he duh lo he hngalh awk). Covid-19 fak piin doh an duh nak thanhca an chuah. Pu Victor hrim nih cun a share mi caption ah “a tu lio caan ahcun Covid-19 lawnglawng doh ding a si awk a si” a ti. Țha ngaingai. Pupu Victor nih “ka dairy” timi cauk a rak chuahmi ka rel bal i, ka mitthli tampi a rak tla bal. Ka upat mi a si. Kha lio an rak temnak le lungput kha dong loin ka upat lai. Nain Corona doh ding i, an ralțhat ning le thathawh ning bantuk te hin zei dang zong ah tho ve seh law țha tuk lai ta. Corona hi zei tin dik an doh lai hngal rih hlah.

Cabia hi thongtam tuk a țial ve mi ka si nain zei tik hmanh ah Lai Ral Kap a thar derh nak kong ka țial bal lo. Hi hnu zong ah țial kaa tim lo. Nain Ralkap thar derh duh mi Mino an tam ngai hi hmuh awk a țha. AA va doh ve nak caa theng ah khan si loin, a țhawngmi Ralkap bu ser ve nak caa hrim ah le, cu pah cun AA zong cu tactic ting khat hmang in Paletwa an kan chuh mi chung khan chuah ve ding ti phun khi a si. AA doh ding ti tikah Kawl ralkap dawt ding ti nak a si lo. Nain Laimi Ar-ek thluak paoh nih cun AA van ti le cang-kaa in Kawl ralkap an awi tuk lai lo maw an ti țheu. Kha kong zong kha nan mah nak in a let zakhat in kan hngalh deuh thiam ko e. Kawl Ralkap nih cun Chin State ah kan um ti an hngalh. Kawl State a si lo an pom.

Nain AA nih cun Paletwa kha Chin State si loin Rakhan State chungah luh ter an duh. An mang hmanh ah a ngah lai lo nan ti nain a hmunmi ralhruang an ser ahcun dih ko teh. Tlangcung mi dang vialte zong midang state ah pei control area an ngeih cio hna cu. CNF lawng pei mah state chung hmanh ah Control Area a ngei lo ko cu. A tu i Camp Victoria pawl khi Hlanhmi lawng a si. Tlangcung dang cu a tir te khan Hlanhmi si loin an rak ngeih dih cang. AA le bang nih cun Control Area men an duh mi si ahcun Paletwa le Arakan state ah tam tuk an hmu lai. Nain Control Area ngah nak men a si lo an chim. A niam bik Wa Ram bantuk Confederation kha an hmui tinh a si tikah Paletwa cu lak chih an duh kha mihrut hmanh nih pemh ding tluk a si.

Cu tikah Mino he Upa he Ralkap thar derh duh mi an um hna. Thawngpang a van len tikah Micheu ve nih cun fim cuh nak le CNF upa te sin in Mithmai țha hmuh nak ah ti phun in Ralkap thar derh aa tim mi kha an van soi hna. Ek hmanh nan tluk lai lo an ti hna. Bia nek fakfak an hman. Kan chimh hna. Ralkap thar derh a timtu hna khi an mah pawpuarnak caah an tuak a si lo. Nang mah limhaang caa deuh kha a si leh lam. An derh lo zong ah nang mah nakin an sungh nak ding um hlei lo.

An mah miaknak kawl ah ma nan ruah hna? Nan mah ko kha pei CNF upate nih van ka fak hna seh, mit hmai țha van ka pe hna seh tiah a herh lomi na chim ko cu. An mah fak cu zei ah naa tuah lai? A tu lio ah CNF va fak ruangah a ho hmanh mifim sin in thangțhat an ton lo lio te a si. Nan mah bantuk Fak duh pawl ve lawng nih khan an van in fak hna i a si ko. Nan lungchung lila cun CNF santlai lo taktak an si cu nan hngalh ve ko. Nain Fak nan duh tuk ah a daw bik hna bang nan i um ter. Kan chim hna, a nan mah bantuk lubo pawl dawt lawng kha a za lo ti hngal uh.

Ralkap thar derh lo zong ah derh duh pawl an sunghnak a um lo. Nain a nang mah bantuk in CNF a hlei hluat dawtu bang aa umter mi minung ruangah CNF huat chin nak a karh lai i, a ho hmanh nih fang khat zong an bawm duh ti hna lai lo. CNF daw bik bang micheu nan ca post le comment hmuh mi vial hmanh ah CNF huat chinnak ding tu nan pawiter cang. A tu ah CNF cung ah a zai mi pawl hi minung pakhat pahnih te lawng ah ma nan ruah? Facebook ah Like zong pe bal lo comment zong pe bal lo Lai Mipi tampi an um. Cu vial te zong an lung chung cun an zai ko teh.

CNF caah tam bik bik pe tu hmanh an lungchung in an zai ko teh. Khua zei a daw bik hna bang, a zai mi cung i, a hrang chin mi kha CNF ral taktak cu nan si deuh. A tu lio ah CNF a zai hnawh tu hna hi Miphun dawtu taktak an si i, a fak mi paoh hi mifirkhu nan rak si. Fak caan a um, zai zaan a um. CNF cung kan zai sawhsawh mi kha huatnak ah nan thlen lai hih. Dai tein rak um uh. CNF zong nih kan zai mi hi ngaih sawhsawh piak men kan duh ti lo, a tak in Ralkap Bu țhawnter nak kong khua an khan a herh lai.

Khuami pawl va țhih phaih i hramhram vaa rawt ter, an duh lo tikah Mipi nih pei nan duh lo cu ti phun i a kuat lak kha a poh ti lai lo. Mi rawt ningcang zong a um i, thiam a herh. Rawt hau loin Mipi lunglak i luh ter nak tactic hmanh a um. A tu nan um ning zoh ahcun beggers style a si caah a ho hmanh nih an luh duh lo nak a si. Mihrut zong nih fiang ding in hrilhfiah ka duh nain a caan ka ngei ti lo. Aa fiang mi paoh kha mifim le fiang lomi paoh cu. Credit: Siang Bawi