By Salai Lairamthang: US thimnak result nan zoh tik ah state 50 ning in zoh a hau lai lo. A tanglei state 7 result nih bia a khiah lai. Mah state 7 hi swing state tiah an auhmi hna a si. Mi zei party dah an vote lai timi le ahodah an vote lai timi chim khawh lomi state an si. Mah state 7 ah hin electoral college vote total 114 a um. Mah state le electoral college vote 114 hi special in an i cuhmi cu a si. Mah state lawng ah hin President Trump le Joe Biden atu le atu kal in election campaign an tuah nan hmuh hna lai.

Arizona: (6) Florida: (29) Michigan: (16) North Carolina: (15) Pennsylvania: (20) Wisconsin: (10) Ohio: (18)

A dang state cu Democratic party le Republican party nih an tei lai tiah 100% ah 100% tei cia bantuk in ruahmi an si cang. Red state le Blue state an ti hna. Bianabia ah California cu Democrat ta asi caah President Trump nih election campaign tuah a hau lo. Cu bantuk in Texas cu Republican ram a si caah Joe Biden nih election campaign tuah a hau ti lo. Laimi kan tam biknak Indiana state zong Republican party ram a si caah zei party hmanh nih election campaign tuah a hau ti lo. Swing state timi cu aho party lei hmanh ah a tang lo i, zei party nih a tei lai timi chim chung khawh lomi sate an si. Cucaah mah state ah a ummi hna nan vote cu a biapi tuk.

President hlun George W. Bush le Al Gore president an rak i cuh lio ah Florida state ah George W. Bush nih Al Gore cu thimfung 537 lawng in a rak tei caah Florida electoral college vote 29 cu Bush nih a laak dih caah a tei. President tlinnak caah electoral college vote 270 ngah a herh. State pakhat i vote tambik a teimi paoh nih state electoral vote a laak dih lai. “Winner-take-all” ti zongah an auh. Cacawn ni hnih ni Tuesday President thimnak result nan zoh tik ah a cunglei ka taar mi state 7 result lawng zoh ding a si lai. A dang cu rel cia le tei cia bantuk ah ruahmi an si.