Zeiruangah US Khrihfa Nih Donald Trump An Dirkamh: President Donald Trump nih Pathian a zumh le zumh lo ka hngal lo, a pianthar le thar lo zong ka hngal lo. Keimah hngalh khawhmi zong si lo. Ahohmanh nih nan hngal cio lai lo, a hngaltu cu Pathian le amah lawng an si. Asinain pakhat belte fiang tein ka hngalh i, ka chim ngammi cu khrihfa a kan dirkamhnak tampi hmuh khawh a si. A tuah sernak hrimhrim in a langhter.

Obama chan ah Khrihfa tampi cu an lung a fak. Khrifa zumhnak zei ah a rel lo, khrih muisam a kengmi poah duhsah tein hrawh a timh. Khrihfa hna zumhnak tampi a filter. Mah ruangah US Evangelist minthang bik, Billy Graham fapa, Franklin Graham hruainak in zumtu hna le Donald Trump caah state 50 ah kum khat chung khual a tlawng i thlacamnak in a bawmh. Khrihfa tampi tthanghphawhnak a um caah khrihfa tampi nih election ah Donald Trump cu thimfung an pek. Khrihfa tampi nih Pathian thimmi a si tiah an zumh. Ramdang vuanci Mike Pompeo zong nih Pathian thimmi a si tiah a chim bal. Obama chan ah khrihfa tampi an hngawng a phettu hna le a thattu hna, SIS pawl cu vawleicung hmun kip ah an thio dih hna. IS hruaitu, alu bik a simi, Abu Bakr al-Baghdadi zong a thah.

US biaceih zung sangbik, Supreme Court ah khrihfa zumhnak hrampi a dirkamhtu, conservative justice minung pahnih Neil Gorsuch le Brett Kavanaugh cu biaceih bawi rian a pek hna. Federal Judge ah khrihfa zumhnak a dirpi tu, conservative judge minung 170,Circuit Court ah khrihfa zumhnak a dirpi tu, judges 44 le District Court ah khrihfa zumhnak a dirkamthu, judges 112 rian a pek cang hna. Vice President caah khrihfa tha taktak a simi, Mike Pence a thim. Mike Pence nupi cu khrihfa sianginn ah ca a chimmi a si. Cabinet meting ah thlacamnak in a thawkpi tawn hna. Obama nih a rak hrawhmi, US khrihfa hna thlacam ni, National Prayer day cu a nunter than. Obama chan ah Merry Christmas ti chim duh loin, “Happy Holiday” ti tawnmi kha “Merry Christmas” tiah ho mihhmai zoh loin thangpi in a aupi ngam.

Public School i, thlacam ruangah ahohmanh nih hna hnawhnak pek khawh lo ding in, executive order a chuah. Religious Liberty timi biaknak zalonnak caah executive order zong a chuah. Obama nih Transgender shool law a rak tuahmi a hrawh. US mipi nih pekmi tax in ramdang ah nauthah le nau hrawh a bawmtu hna, INGO pawl cu cozah nih a pek tawnmi fund a phih piak hna. Obama chan ah nauthah le nau hrawh ruangah federal cozah nih phaisa rak bawmh tawnmi Planned Parenthood pawl cu fund a phih piak hna.

ProLife timi, nau thah, nau hrawh a duh lomi bu nih an tuahmi tonpumhnak ah amah pumpak in a telpi hna pin ah biachimnak zong a ngei. US tuanbia ah avoi khatnak President nih a telpi mi hna a si. Muslim pawl nih kum tampi chung Israel khualipi an cuhmi Jerusalem khua cu Israel khualipi ah a cohlan pin ah Jerusalem khualpi ahcun US palai zung a thial. US president ahohmanh nih an tuah ngam lomi le an tuah khawh lomi a tuah.

Kum 1967 ah Israel ram cu Arab ram 5 nih laakhruak in ni 6 chung an rak tuk hna i an rak tei kho lo. Mah lio ah Israel nih Syria ram Golan Heights tlanghluanpi cu an rak laak. Tuchun ni tiangah UN siseh, ramdang dang si hna seh Israel ram ah an chohlang bal lo. Asinain President Trump nih Golan Heghts cu Israel ram ah cohlan cang. Cucaah Israel President Benjamin Netanyahu zong nih President Trump sin ah lunglawmhnak bia a chim. President Obama chan ah khrihfa cheukhat hna cu, Pathian zei ah a rel lomi zum lotu hna le biaknak ngei lomi hna nih a phunphun in an serhsat hna i taza zong an cuai hna. 2015 ah Kenturkey county ah cozah riantuanmi, Kim Davis cu Same sex marriagge a pom lo ruangah Same sex Marriage a tuahmi nuva hna cu marriage licence a chuah piak duh hna ruangah thong an rak thlak.

Colorado ah changreu le wedding cake tuah in a minthangmi, khrihfa tha Jack Phillip cu nupa sinak a thlengmi nu, Autumn Scardina,nih taza acuai ve i atu hi a voi thumnak tazacuai a ton thannak si. Autumn Scardina nih a chiatha a thlennak lawmhnak caah Jack Phillip cu cake tuah a fial i, ka zumhnak he a kalh caah ka tuah kho lo a ti caah na kan thleidan a ti i, dsicrimination in taza a cuai cu a si.
Jack Phillip timi pa hi Wedding cake ser thiam ah Colorado Lakewood khua ah minthang pakhat a si. Amah cu Pathian a zum ngaingai mi,a zumhnak cungah fek tein a dirmi, khrihfa tha pakhat zong a si.

2012 kum ah khan gay nupa a simi, [ pa pahnih ] David Mullins le Charlie Craig nih an wedding tuahnak caah cake tuah an fial i, Jack Phllip nih khrihfa kan zumhnak he a kalh caah wedding cake kan ser piak kho hna lo’ tiah a rak khirh hna. Gay nupa hna nih minung a kan thleidan an ti i, an volh an pamh hnu ah an chuah taak. Mah kong cu Gay couple hna nih mi a kan thleidan, discrimination a kan tuah tiah social media kip ah an phozaar. Wedding cake sertu Jack Phillip cu same sex marriage a pommi le a ttanpi tu pawl nih um thiam loin phone an chonh, a phunphun in an hrocer, thah ding tiang in an rak thih pheih hnu ah taza an cuai beh. Calorado biaceihtu hna nih chang tuahtu Jack Phillip cu mi na thleidan an ti i amah tu sual an rak pek.

Jack phillip nih ka zumhnak ruangah zalong tein pek lonak nawl ka ngei a ti i, a lung a tlin lo caah Donald Trump President a tuan hnu ah Supreme Court ah biachahnak tuah piak dingah a hal hna i Supreme court nih kum 5 renglo hnu ah teinak an pek than. Supreme Court ah minung 9 an umi, minung 7 nih Jack Phillip cu teinak an pek. Mah biachahnak cu khrihfa mi hna caah thawngtha ngaingai a si. Na zumhnak ruangah same sex marriage pawl nih wedding cake siseh, pangpar siseh, wedding tuahnak he pehtlaimi kongah hranhram in fialnak nawl an ngei kho ti lai lo.

President Donald Trump nih election campaign lio ah khrihfa mi hna thleidannak an tonmi hi a dik lomi a si, an zumhnak ruangah thleidannak an ton ding a si lo. President ka si ahcun Supreme court ah Pathian a bochan mi biaceihtu ka thim lai a ti i, ati ning bantuk in Neil Gorsuch le Brett Kavanaugh cu supreme court biaceihtu ah a thim taktak. President Donald Trump hi minung a si ve caah a tlin lonak tampi a um ko lai. Asinain Khrihfa hna tthumchuk lei a pamhnnak le khrihfa zumhnak a fil cuahmah mi US ram khrihfa hna caah cun a kan chanchchuah tu President a si tiah ka zumh. Credit: Salai Lairamthang