Kan chim lengmang bang, kan naupa Ngun Dawt an vuakning cu video in nan hmuh cio cang lai tiah ka ruah. Cun, a sining zong zeimawzat cu nan theih cang men lai. Amah hi ngakṭah a si i Pi Zing Hlem nih sinah aa dormi a si. A konglam a tangleiah tling deuh in rel khawh a si lai.

Tutan zongah awṭha hlasakthiam kan i ngeihmi Zaabung khuami Hannah Van Hnem Par (Parku) nih kan naupa Ngun Dawt caah tiin thong 50000ks bawmhnak a pek tiah kan theih. Cu bawmhnak a pekmi cu a chungkhar nih lunglawm tein an cohlan. Lawmh a tuk hringhran. Amah hi mino te sianginn kai liomi a si. Asinain zawnruahnak nganpi he a tubantukin a ngeihchunte kan naupa Ngun Dawt a pekmi hi a si. Zohchun awk tlak taktak a si.

Kan naupa Ngun Dawt bawmhnak a petu Hannah Van Hnem Par (Parku) konglam tawi;

Hannah Van Hnem Par (Parku) hi a chuahkehnak khua cu Zaabung a si. Amah atu lioah Gospel Singer kan i ngeihmi pakhat a si. Awṭha hlasakthiam a si i a sakmi hla tete zong Youtube hmuh/zoh ding tampi a um.

Atu i a umnak Halkha Chinosi sangah a ummi an si. Atu hi Baibal lei Theologi Diploma
Final Year (Pathian bia a cawn cuahmahmi) a kai liomi a si. Pathian nih a lam a hruai in damnak pe ko seh. Tukum ah Baibal sianginn a kaimi cu a dih lai, tukum ah boih (degree) a laa cang lai. Hihi a konglam tlawmpal mipi sinah langhter chih kan duhmi a si.

Tuzingah CBN news nih thawngpang thar hitihin a taarlangh ve,“Breaking News: Kan hnu zarhpi Ni ah Thangzang Khua mi tleirawl a vuatu chungah minung pahnih cu nihin ah Hakha Palik nih an tlaih cang hna. A rauh hlan ah CBN nih thawngpang kan hun tharchuah lai. CBN News,” tiah an taarlangh ve.

Velh a tongmi Ngun Dawt hi atu sizungah a um ko rih. Halkha palek zong nih atu hi hlathlainak an kalpi cuahmah lio a si. Cun, a veltu chungkhar pa 5 hna nih velh a tongmi Ngun Dawt te chungkhar hna zong tonnak an ngeih cang hna. Asinain Ngun Dawt chungkhar lei nih kanmah chungkhar kan i tong hmasa lai tiah lehnak an tuah hna.

Velh a tongmi Ngun Dawt cu palik nih biahalnak zong an tuah cang tiah theih a si. Velh a tongmi Ngun Dawt chungkhar lei nih siseh hlathlainak a cuahmahmi Palek lei zong nih atu tiang cu thil sining zeihmanh an chim fian kho rih lo. Cun, tutan Ngun Dawt a velhtu hna hi midang theih lomi an si lo. Amah a hawikom an hawi tukmi an si hna ti a si. Hmunkhat te a tlawnglengṭimi le a it ṭi tawnmi te an si tiah a konglam a theitu sinin kan theih. Thawngpang thar a um cun a si khawh chungin thanhṭhan khawh kan rak izuam lai.

Ngun Dawt an velhning le a konglam tawi;

Ngun Dawt, kum 15 tluk tlangval hi Thangzang khua mi, Pu Sang Kam (Tleicia) le Pi Ngun Taang (Tleicia) hna i an fale hna 3 lakah a hniangbik a si. Kum 2 a si ah a pa nih Malaysia ah a thih taak hna, cu tlawmpal ah a nu nih a thih taak. Halkha ah umnak a ngeih lo caah Hniarlawn khuami, Pi Zing Hlem sinah aa dormi a si.

Amah hi taang 9 a kai liomi a si i nulepa nih thih taakmi ngaktah buangro a si. A luan zarh chungah Cycle cung tluknak in a kut aa rawk caah sizung ah a hliamhma a tawl lengmangmi a si. Atu hi sizungah an um lio a si. Hi vial hi Ngun Dawt konglam kan rak langhter chih duhmi a si.

Amah a zohkhenhtu Pi Zing Hlem nih thil sining kong a chimmi;

Ngun Dawt a zohkhenhtu Pi Zing Hlem nih aṭialmi cu ,“An velhmi pa hi a keh lei kut a khawng i nifatin sizung ah a hma ṭawl ah a kalmi a si. Sizung ah um ding asinain a kan a na rua a tiin a langtu in nifatin a hma ṭawl ah a kal mah ni celngel cu a ke in a von lawi. Voidang ah cun saikel in a Kal ton i mah ni cu a thlah don tu a ngak kho hna lo i ke in a ṭin. A ṭin pah amah tikhan velh a tonnak hi a si,” tiah a chim.

A pehrihmi cu, “An vuak lio ah a velhtu hoi nih video a zeih hna i midang sinah an kuatmi kha an kan kuat chinmi a si. Phorhlawt bia ah an ṭhawnnak an ni zeih bia si. Nain ngakṭah dawtu Pathian nih a phuan hna bia si ko khah. An velhmi hi nu pa ngei lomi a si. Kan sinah a um i tangkua a kai liomi a si. An khua cu Thang Zang asinain hohmanh nih an hlam kawl ballo,” tiah amah a zohkhenhtu Pi Zing Hlem nih Ngun Dawt an vuaknak video ah thil sining an halmi lehnak a tuah.

An vuakning konglam amah zohkhenhtu Pi Zing Hlem nih hitihin a ṭial, “ Avoikhatnak cu an zate in an velh i video an thla/zeih manh lo. A thi a chuakmi an ṭawlter i cu hnuah avoihnihnak an velh lio an thlak. Tlaih cu chim lo aa bawmmi lawngte an si. A vuatu hna hi minung 7 an si,” tiah amah a zohkhenhtu Pi Zing Hlem nih cun a chim.

Kan naupa Ngun Dawt caah tiin Salai Robert Ngunsang nih Gofoundme hmangin bawmhnak a tuah i a dihlak in an i hmuitinhmi hi US $2,500 a si i atu tiangah US $1,243 a chuak cang. A petu vialte cungah lunglawmhnak tampi kan ngei. Atu bantukin midang caah kan ngeihchunte kan pekmi hi alaak a si hrimhrim lai lo. Pathian tu nih a letza in thluachuahnak in pe ko hna seh!

Gofoundme timi hmehpiak law bawmhnak pek khawh a si lai.

Admin hmurka: Chinworldnewsvening nih thawngpang kan ṭialmi hi kanmah nih kan phuah
cawpmi kan ṭialmi a si lo. Reference/Credit/Source ṭha tein kan pek peng lai. Cucaah
thawngpang kan ṭialmi kan palhnak a um cun theihter khawh peng kan si.
Chinworldnewsevening page ah le J Van Duh Thar Lahnin ah pehtlaih khawh peng kan si. Mipi sinah
thawngpang thlazamh na duhmi um cun kan i thlahzamh piak khawh zungzal. Cun, Chin World
News Evening thawngpang kan ṭialmi 24hrs tlin hlanah (copy paste) na kan tuahpiak lonak lai kan in nawl duh hna.