By Pawlung Thawng Thangnget: Chin ralkap CNA cu Paletwa mipi nih an herh hna caah Chinram Paletwa an phan cang tiah ka ṭial hnu in minung 7 bak nih contact an ka tuah colh i CNA bawmhnak caah phaisa kan pek ve lai an ka ti colh. A tam deuh hi mino an si. CNF/A bawmhnak caah phaisa a petu lak ah pakhat cu Melbourne ah Pastor a ṭuan cuahmah liomi a si. Kan pastor nih aa fianmi cu CNF/A an rian ṭuannak hi Chin miphun luatnak le Chinram humhimnak caah a si tihi 100% bak aa fiang ti a lang. Miphun le ram a dawmi Pastor a si caah ka upat tuk.

CNF/A Chinram Paletwa an phan cang tiah ka ṭial mi cu US-CHIN MINO timi page nih Laica le kawlca in a post ṭhan i Indianapolis um Matu pa nih $200 a thoh colh tiah Chin Matupi Olthang group ah an langhter colh ve.

A bik in ṭial ka duhmi cu Chinram Paletwa kong hi a si. Chin miphun nih kan interest bikmi hmunhma cu Paletwa hi a si. Paletwa cu Chinmi kan unau an si caah a tulio an tuarmi harsatnak hi ahopaoh nih kan celh lo i kan ngaih a chia tuk cio. A kan nehsawhtu Miphun dang hna cungah kan lung a ṭha lo i kan thin zong a hung, kan ngaih zong a chia.

Chinram ah Paletwa hi Economics hmun a ṭhat biknak hmunhma a si caah kan ram hi ṭha seh law Chinram caah phaisa income a ṭhat biknak hmunhma a si. Vawlei cung ram nganbik a si mi Tuluk le India zong nih Economics lei in Paletwa hmun hi lak an duh veve caah i zuam cawhnak a um. Culakah Bangladesh zong an i tel ve. Rakhian hruaitu cheukhat zong nih Paletwa hi lak an duh caah kan ram a si an ti ve.

Kawl ralkap zong nih Chinram Paletwa hi anmah nih uk peng an duh caah CNF/A cu nihin tiang hmunhma an kan pe duh lo. Chin miphun caah cun kan ral hi a tam ngai ko. Cu vialte ral lakah Chin ralkap CNA cu Paletwa an phan cang. Thihnak le nunnak ral tampi karlak ah a kalmi CNA/F hi ramdang a phan cangmi Chin miphun nih kan chawva tal in kan bawm kho ve hna lai lo maw? Tuahsernak aa tel lomi kan kaa lawngin maw, Chinram hi kan dawt lai?

Chinram um Halkha le Thantlang mino hmanh nih CNF/A caah innkip le sangkip ah an kal i phaisa an khawlh piak ngam hna cu. Chinram humhimnak ding ah miphun le ram dawtu nusal ṭha le pasal ṭha hna, thazaang kan chuah kho ve ko lai lo maw? Kanmah le mah biahalnak i tuah hna usih law Chinram Paletwa humhhaknak le Chinram luatnak caah chawva le thazaang chuah in kan ram hi kilveng cang hna usih. Cuticun CNF/A thazaang kan ṭhawnter lai i a rauhhlan ah CNA ralkap 1,000 cu Chinram Paletwa ah kan chia kho colh hna lai. Chinram le miphun nih nangmah le keimah hi a kan herh tuk lio caan a si. Phungtungtu Chin pasal ṭha, Chin nusal ṭha vialte hna, tho cang usihlaw Chinram hi humhhak cang hna usih.

Nawlnak: Copy a ngah ko na’n Kawlca in ka leh piak hram hlah u ti kan nawl hna.