Atu lio kan lai hlasakthiam pawl kan zoh hna tikah an hlathar atu karhrawng cu an hlathar ngaih a tlawm ngaingai. A um lo ti tluk khi a si. Hlathar ngaih ding a um lo chin lengmang. Lovesong  (Zuun hla) tu hi a ngaih ding a um pah lengmang ko. Asinain Pathian thangthatnak hla (Gospel song) tu hi a tlawm ngaingai kan hlasakthiam pawl zong nih hlathar tete kan chuah kho tthan hna sehlaw ttha tuk hnga.

Cu ti i Pathian hlathar ngaih awk a um lo kan ti lioah Gospel Singer kan i ngeihmi hlasakthiam Pu Bawi Thiang Bik nih hla ttha hla dawh taktak “Thisen Dawtnak” timi hla a vun kan chuahpiak tthan. A aw ngaih a nuam i a hla hrimhrim a tha kho tuk. A hla sullam ruat bu tein rak ngai hmanh zeitluk hla ttha dah a si. A ca in i tial sehlaw Sermon ding tlak taktak a si.

Laimi cu hla kan ngaih tikah a hlabia ruat setsai lem loin a hla kalning hei ti le, a aw tuahning hei ti bantuk deuh hi a ngaimi kan um ttheo tawn. Ahman ve ko ngaih phung cu a si ko nain cu nak in a biapi deuhmi cu hi hla ka ngaihmi nih hin zei bantuk tthathnemhnak dah a ka pek lai titu in kan ngaih deuh awk a si. Hlasakthiam Bawi Thiang Bik nih a sakmi hla thar “Thisen Dawtnak” timi hla thar lungthin takin ngai dingin kan sawm hna.