Hlasakthiam Esther Dawt Chin Sung nih atu lio ahcun manager ka ngei rih lo, ka kawl cuahmah lio a si a ti. Cun atu hi Album zong chuah ai tim a buaipi cuahmah lio a si i a ruah hlanah Album thar a ngei lai. Mipi zong a album chuah lai an i ngaih taktak.

Esther Dawt Chin Sung: MMID hlasak zuamnak pakhat ka comi cu thil dangdang caah ka hman hna. A hmaisabik ah Pathian sinah cheu 10 cheu-2 hi kan pek lai tiah bia ka rak cang bangin cheu-10 ah cheu-2 cu Biakinn saknak caah ka pek. Phakhan ah Biakinn le Hakha khuathar Biakinn saknak caah ka tel ve. ka telnak bik cu Asho Chin hna nih Biakinn an sakmi ah a si i hringtu ka pa a rak tel cang nak a si caah kapa ai ka awh. Chin Idol ka si lio zongah ka rak i tel i Myanmar Idol ka hung si hnu zongah ka tel tthan.

“Cun nulepa ngei lomi ngakttah caah ka si khawh tawk in ka zuam ve. Tampi ka chim lai lo, zeiruangah ti ah cun midang caah kan tuahmi thil hna cu mipi hmaiah i phozar lengmang hau loin Pathian nih ka thil tuahmi a ka theihpiak cun a za ko tiah ka ruah. Ko Hey Lay, Min Khai le Mah Seih hna hi hlaphuah thiam minthang an si i ka album caah hla zong an ka phuah i a dang hlaphuah minthang hna zong ka album sak ding hla ka phuahtu an um. Atu hi album ka chuahmi hna biatak tein ka zuam ve rawl-ulh thlacamnak in hram ka thawk cang i Pathian kutah ka album zong ka ap cang. Zeiruangah ti ah cun mithar ka si caah zeihmanh ka thei rih lo i ka caah a har ngaingai. Cucaah nifatin Pathian he kar ka hlang i thlacamnak in caan ka hmang.

“Album chuahnak ca zongah zeihmanh ka theih hlei loah ka thiam l i Idol lei nih zeizong vialte an ka tuahpiak dih. A donghnak bikah keimah tein Album tuah i tim ning law zeihmanh ka tuah thiam lai lo. Cucaah ka album hmaisa a si caah Pathian kut ah ka ap i rawl-ulh in thla ka cam ve” tiah MMID winner a simi Esther Dawt Chin Sung nih a chim.