By Chelsea Bawi||05|Biangreithlep15|2020|| WHO: Coronavirus hi Zeitikhmanhah Kian Ni a Ngei ti lo Kho Men. Coronavirus hi zeitikhmanhah kian ni a ngei ti lo kho men, tiin WHO nih an chim. Coronovirus a kian te lai kong chimchungnak he pehtlaiin ceihhmainak an ngeih lio ah, a tu bantuk in WHO emergency director Dr. Mike Ryan nih ralrinpeknak bia a chim hi a si.

Kakuaisii (vaccine) hi ser khawh a va si ko hmanh ah khin, coronavirus control khawh ding hi rian harsa ngaingai a si thiamthiam ko rih. Vawlei pumpi ah virus in a thimi hi minung 300,000 hrawng an phan cang i, 4.3 million hi a zawmi an si. Coronavirus tih ruangah thinlunglei le thluaklei zawtnak in a zawmi an karh ngaingai cang, tiah UN lei nih thawng an thanh, abikin lungthin lei ngandamhnak zohkhenhnak a tuah kho lo mi ram pawl ko ah hin a si khun.

Cucaah, coronavirus kan doh tikah hin, virus tih ruang i thluaklei a rawkmi thlobulnak thazaang zong hi a ram kip nih kan chuah awk a si, tiin UN nih thazaang a pek hna. Hi virus hi khua kan saknak hmun cio ah HIV bangin a caambual thai kho men. Kan sinin a tlau ti lo kho men ko. HIV zong a tlau ti tung lo. Asinain, tutan virus belte nih cun caan te i ngeih sehlaw a dawh. Hi virus a loh te lai nak caan hi ahohmanh nih an chimchung khawh lai ka zum lo, tiah Dr. Ryan nih achim.

Kakuaisii (vaccine) 100 hrawng hi chuah khawh an i zuam cuahmah lio pi a si. Asinain, hmaihuu (Kawl holh in – wattetpoh) zawtnak caah vaccine an ser cang ko nain, hi zawtnak hi an hlo kho taktak rih hlei lo. Asinain, thazaang kan chuah cio ah cun hi virus hi kan control khawh ko lai, tiah WHO Director-General Tedros nih a chim. A tawlrel ning le cang kan kut ah a um cang. Cucu mikip kan tuanvo cio a si. Cucaah, hi virus hi kan khamh khawhnak dingah cun a mikip nih thazaang kan chuah cio a hau, tiah Tedros nih a chim.

Ram tampi nih lockdown an tuahmi kha on an hun thok cio ve cang hna i, an rian tete zong cu on an thok cio cang hna tikah, WHO an thin a phang ngai. Coronavirus avoihnihnak (ai nolh) a ratmi hi thitha in kan doh khawh tung lo ah cun, khamnak (lockdown) tuahmi vialte hun on phut hi cu thih a nung ngaimi a si, tiin Dr. Tedros nih a chim. Ram tampi hna cu i khamkhennak chungin an hun i luatter cang hna. Asinain, zei ram hmanh hi a si khawh chungin ai ralrin ah a tha ko, tiin a chim.

Lockdown tuah hi a thatuk. Lockdown tuah mi hun on than hi a tha chinchin, tiin tonghmang lo in khua a ruatmi an um. An pahnih tein thinphang dailo an si veve peng ko rih, tiah Dr. Ryan nih a chim. Chirhchan:BBC