World Health Organisation (WHO) nih Corona Virus kong pehtlai in biathli (information) phuan duh loin a thuh rih dingin China nih a thlauh tiah thawngzamhtu hna nih an tarlanghmi cu thawngpang dik lo tiah a si tiah ralṭha ngaiin a hun chim ve cang.

Germany tadinca pakhat, Der Spiegel nih cun WHO Direcor-General Tedros Ghebreyesus le China President Xi Jinping hna cu Tangkhawng 21 ah phone in an ichawnhnak kong a tarlangh ve. President Xi Jinping nih hin Covid-19 pulrai zawtnak hi minung le minung i chawnh kai khawh a si timi le Gobal Pandemic Warning a si ti phuan ding ni le caan tlaiter dingin Tedros hi a chimh tiah an tarlangh. Thawngzamhnak an tuahmi hi Germany Foreign Intelligence Agency, BND sinin an theihmi a si ti an tarlangh chih fawn.

WHO nih Germany tadinca nih thawngzamhnak a tuahmi hi thawngpang diklo a si tiah chim in, China President Xi Jinping le WHO Director-General Tedros hi an ichawn lo hrimhrim tiah an chim ve. WHO le vuleipi nih Covid-19 doh in an thazaang an chuah lioah atu bantukin thawngpang diklo an phuahmi hi kan rianṭuannak zong a kan donkhantu thil a si kho tiah a chim chap.

China nih hin Corona Virus hi minung le minung ichawnh a si ti Tangkhawng 20 ah fehternak a rak tuah cang tiah WHO nih cun a tarlangh. Cu thil cu China nih fehternak an tuah hnuah WHO Official hna zong nih Wuhan i zawtnak an hmuhmi hi minung le minung ichawnhmi ti a si. Asinain fiangfai deuh in dothlatnak kan tuah ṭhan lai ti thawngthanhnak zong a tuah ko tiah a chim. WHO nih Nohawng 11 ahkhan Covid-19 zawtnak cu Global Pandemic ah a phuan.

A karh cuahmahmi Covid-19 pulrai zawtnak kongah WHO nih voi tampi soisel le thangchaitnak ramkip sinin a ton i, cu hna lakah WHO a soisel taktaktu le a mawhchiat taktaktu cu US President Trump hi a si. President Trump nih Covid-19 zawtnak kongah WHO thil tuahmi cu soisel in a mawtchiat hna i China lei ṭangmi ah le China he an pehtlaimi ah a puh i US nih WHO ah tangka (fund) a thawhmi tiang a ngol phah.