Voi 217 Baibal Cathiang a chuahtu Pu Biak Kam hi lawmhpi cio hna usih a kut tiangin Baibal Cauk a ṭial cang

Chin News

Falam peng, Than Hniar khuami Mizoram Champhai khuapi Zotlang ah khuasa mi Pu Biak Kam cu Bible a duh tuk ruangah le Bible sianginn tibantuk zongah kai loin Bible rumro a rel i Bible cu voi 217 a chuah cang. Bible voi 217 tiang a chuah caah a min ah Bible Biak tiah a min phuah a si.

Bible hi a voi in voi 217 thengte a chuah cang. Mi tampi nih kan zum lo kho men nain, a rianṭuannak tibantuk le rianṭuan a dinh caan ah zeidang thil tuah loin Bible rumro a rel i amanh te amanh ko cun Bible rel in a caan a hmang zugzal. Zinglei sml 2,3 ah tho in thlacamnak le Bible relnak in caan a hmang lengmang tawn.

Nifatin Bible rel cu a rian pakhat bantuk a ruah i a rianṭuannak hmun tiangah Bible cu i ken in rian an i dinh caan tibantuk ah zeidang thil tuah loin Bible ṭhiamṭhiam cu a rel tawn. Cucu nifatin a caan hmanning le a nun hmanning cu a si. Bible konglam a theih ruangah Mizoram ah Pu Biak Kam a thei lomi an tlawm te lai.

Cutluk cun Bible a duhmi le rel a duhmi a si. US i Bible kong biahalnak an tuahnak ah Bible he pehtlai in biahalnak an tuahmi cu pakhat hmanh hrelh loin a leh khawh dih hna caah Bible sianginn hmanh kai loin Biblee Doctor Degree pek a rak si cang. Bible hi voi 217 a chuah lawng si loin a kut min voikhat a ṭial dih cang.

A nun lamthluan ah harsatnak tampi a tong ve. A ngal ruh a kiak i sizungah a va piak tikah cun sibawi ten ih ahh (Operation) tuah na hau an ti i a duh lo. Cuticun amah pumpak thlacamnak in a dam ṭhanmi a si. A angki tongh ruangah a dammi zong an um cang tiah damnak a cotu pakhat nih cun a chim.

Midang bantukin thla va camh hna i thaw in va chim hna tibantuk le a lu tongh i tlukter tibantuk a hmangmi a si loh. Bible lengin biachim a hmangmi zong a si lo. Zumhnak hi zeitluk in dah a biapit le aherh timi hi a aupi lengmang tawnmi a si. Covid-19 ruangah Mizoram lei zong kir kho loin, Laitlang khuate thawngṭha chim in a caan a hmang.

Khual a tlawnnak kipah kutlawng in a kalmi a si. Asinain March in October thla chungah Pathian thluachuah Ks. 10,467000 thengte laksawng a hmu. Amah sawm a duhmi le chawnhbiak a duhmi nih Evan Gabriel BL Sum ( FB – Gabriel BL Sum ) ah pehtlaih khawh a si.

Leave a Reply