Winner Ka Si Ahcun Ngakttah Ka Bawmh Hna Lai. Esther Dawt Chin Sung: Myanmar Idol Season 4 Top 3 tiang a phan nih Esther Dawt Chin Sung lungput le ruahnak cu duh a nung kho taktak. Mino te asi rih ko nain a ruahnak le lungthin a pical khawh ning cu uar lo awk hrim ttha lo. Pathian nih na saduhthahnak tlinter hram ko seh. A tawifiannak in a lungput, a chunmang le a fans hna sinah lawmhnak bia a chim mi tlawmpal kan rak langhter.

Nihin Top 3 tiang ka phak khawh mi hi keimah thiamnak in ka tlinmi le ka tuah khawh mi si lo, keimah thiamnak lawngin si sehlaw atu dirhmun hi zeitik hmanh ah a phan kho ding ka si lo. Hi dirhmun a ka phak tertu cu Pathian le keimah a ka dawtu mipi nan si, Nanmah bawmhnak le dirkamhnak thawngin hi dirhmun tiang ka phak tikah thaa a ka petu nan dihlak cungah lunglawmhnak chim cawk lo ka ngei. A tangmi caan zongah nan thlacamnak le bawmhnak ka herh ko rih.

Benjamin Sum asi ah Aye Mya Phyu asi ah hlasak thiam le aw ttha taktak an si. Cun, kan pathum in tafar bantukin a zohmi le aa daw mi kan si bantukin tutan zuamnak zongah a ho nih teinak kan hmuh zongah aa lawmhpi ding kan si. Cu cu Benjamin Sum le Aye Mya Phyu lungput zong asi. Zuamnak si bantukin teinak kan hmuh lo zongah ngaihchiat le lungnuamh loin kan um ding zong si lo.

Tukum Myanmar Idol Season 4 zuamnak ah teinak (Winner) ka hmuh ahcun nu le pa ngei lomi hngakchia ka bawmh hna lai ti hi ka chunmang le saduhthah asi. A kaupi in ka tuah khawh lo zongah keimah nih ka tuah khawh tawk tein bawmhchanhnak tuah hi ka saduhthah le chunmang asi,”tiah Esther nih a chim. A tangah video tawi kan rak thilchih.