VIDEO: Hakha Peng Sipin Nih Pi Van Bawi Hnem Aithing An Rialmi Piakmi Kongah Pu Thla Hre Nih A Phomh Ve Cang Hna
Atu lio Laimi/Chinmi lakah mipi thinlung a buaitertu tu le ahung linsa ngaimi thawng pakhat cu Thantlang peng Tlanglo Khuami Pi Van Bawi Hnem Aithing Halkha Peng Sipin Lutlai nih an rial piakmi kong hi a si. Hi kongah mipi cheukhat nih upadi phunglam a zulh lo ruangah an hrawhpiak awk si ko, tiah a chimmi an um. Asinain a tam deuh nih cun Hakha peng Sipin rianṭuantu mawhphurh le sualphawt deuh an si.
A cunglei kong he pehtlai in Hakha pengkulh chungah Sipin rian saupi a rak ṭuan cangmi Pu Hla Hre zong nih tutan Halkha peng Sipin rianṭuantu thar nih Pi Van Bawi Hnem cung thil an tuahmi kongah a tanglei bantukin Sipin lutlai sual a phawtnak hna le Pi Van Bawi Hnem cung i an thil tuahmi kongah a lungtlinlonak a chim ve.
Pu Thla Hre “Aithing a zuarmi nu Pi Van Bawi Hnem nih hin Sipin phunglam (by-law) zong a buar khawh kho men i, nawlngeitu nih chiahlah uh an tinak hmun zongah a chiah khawh ko. Asinain Sipin phunglam (by-law) ah eidin asimi paoh hi hrawh le hlonh ti hi Upadi phunglam ah a um lomi a si.
“Eidin hrawh dingah aa telmi cu chemical aa telmi, a buarmi le nitha a luan cangmi hna lawng hi hrawh le tlaih ding ti an si. Cun, phung a buarmi cu phaisa in phunglam a zulh lo ruangah dantat ding khi an si ko. Nain tutan an thil tuah cu an palh taktak. A bikin tutan ah a palhmi hna cu Sipin lutlai lawng si loin Sipin chungtal dihlak in an palh.
“Cu lawng si loin thil ngeitu nu nih dan ka tat hlah uh, biaceihnak zungah kan chuak lai a ti khawh. Cu lawng si loin phaisa a liam duh lo ahcun nawlngeitu nih a thilri kha an zuar lai i, dan an tatmi zah kha an lak lai i, a tangmi paoh kha a ngeitu an pek ṭhan dih ding ti khi a si. Sipin phunglam (by-law) hrimhrim ah eidin na tlaih lai i, na hrawhpiak lai timi hrimhrim pakhat hmanh a um lo. Cu ruangah Sipin rianṭuantu hna nih an nawl i phaisa an liamh i remnak an tuah a herh,”tiah Pu Thla Hre nih a chim.
Note: Video a chimnak in ngaih le ṭial chinmi a si tikah a chimmi nak lengin chap mi le ṭial sualmi zong um kho men, cucaah a fian chinchin khawhnak dingah a tangah video tling tein kan rak taar chih i ngaih khawh cio i zuam hna usih.