An lung rak si cio lo timi a lang ngai ko hih. Myanmar Idol Season 4 zuamnak ah mipi nih uar bik mi hna pathum, Esther Dawt Chin Sung le Aye Mya Phyoe hna kha top 8 zuamnak result phuan lio ah Bottom 3 i an thut termi hna kha kei zong ka khuaruahhar ter ngai ve” tiah Myanmar Idol i biachimtu Kyaw Thet Aung nih a chim.

Cu lawng si loin, Tan Khun Kyaw zong Mula, Thet Inzilin le Naw Saysay Htoo nak in a thiam deuh tuk, sinain Top 8 in an tlakter ruangah Myanmar mipi an buai Idol nawlngeitu hna tiangin vote kongah fiang tein nan langhter awk si, tiah an ti hna.

Cu kong he pehtlaiin ”Myanmar Idol biachimtu Kyaw Thet Aung cu bia an hal, kei zong hi kongah ka khuaruahhar ngai” tiah a chim. Mipi nih uar bik mi pathum Bottom 3 ah an thut cu khua a ka ruah ter ve ko. Mipi nih uar bik mi a si caah Vote pek an daithlang sual zong a si hnga maw ti hna ka ruat, tiah a chim chih fawn. A tangah video tawi kan rak thil chih.

Myanmar Idol Theihtlei relchih: Myanmar Idol hi kum 2016 thawk khan rak thawk si i, a hlawh zong a tling ngaingai. Atu ahcun Eain Mat Sone Yar le Melody Wolrd zuamnak hmanh in a minthang deuh cang. Myanmar Idol hi Shwe Thanlwin Company kal hmangin tuah mi siin, Shwe Thanlwin Company ngeitu hi Daw Nan Mouk Laung Saing asi. Kum 4 chung an tuah cang i, Season 1-4 tiang a um cang. Season 1 ah pakhatnak cu Saw Lah Htaw Wah si i, Season 2 ah Thar Nge asi. Cun, Season 3 cu Phyo Myat Aung si.

A cunglei kong he pehtlaiin Myanmar Idol Executive Director Daw Nan Mouk Laung Saing nih cun Myanmar Idol Season 4 kan dih hnu in Idol 4 kan ngei lai. American Idol he pehtlaihnak zong kan tuah lai i, Myanmar Idol Season 1-4 tiang Winner hna cu American Idol zuamnak ah i tel dingin kan nawl hna lai. Kan winner minung 4 hna hi vawlei cung huap zuamnak ah an i tel kho ve lai, cun Myanmar Idol zong hi mah hi kan i tinh bikmi asi,”tiah Press Show an tuahnak ah a chim.

Myanmar Idol Season 4 a zuam mi hna hi an dihlak in minung 30,000 leng an si i, khuapi panga, Taunggyi, Mandalay, Taungoo, Hpa-An le Yangon in thawk asi. hi vialte a zuam mi hna chungin atu ahcun minung 8 lawng an tang cang. A voikhatnak Season 1 a zuam mi dihlak hi minung 8,000 an si i, Season 2 ah minung 14,000, cun, Season 3 ah minung 20,000 nih min an pek.

Season 4 zuamnak ah Director hi Aung Ko Latt si i, Tin Zar Maw hi season 2-3 ah Judge a ttuan cang mi si. Cun, Phyu Phyu Kyaw Thein tu hi tukum lawngin judge a ttuan mi si. Hi kongah Phyu Phyu Kyaw Thein nih a chim mi cu, “Myanmar Idol zuamnak hi ralrin taktak in kan ttuan lai, minthannak le phaisa hmuhnak, nak in hlasak thiam serchuah tu hi kan timh deuh mi asi,”tiah a chim.

Myanmar Idol Winner: Myanmar Idol winner simi paoh cu CITY FYM he hmunkhat rianttuan tti dingin hnatlaknak (contarct) an ngei lai i, CITY FYM nih kumnga chung a sponsor hna lai. Amah belte voidang bantuk in mah duh paoh i an um tawn mi kha si ti loin, zeitik hmanh ah anmah nawl in khual an tlawng kho ti lai lo.

Cun, hlasak le show ti bantuk zongah anmah nawl in an tuah kho ti lai lo. Tahchunnak ah kanmah Chinmi chungin pakhat khat hi winner si hna sehlaw. CITY FYM he hnatlaknak (contarct) an ngaih hnu cun US, Australia, Malaysia le ka dang dang um mi nih an sawm hna zongah CITY FYM nih kalnak nawl an pek hna lo cun an kal kho lai lo. CITY FYM sinah theihternak an tuah lai i, tlawnnak nawl an pek hna hnu lawngah an kal kho lai. Cun, Hlasak le show ti bantuk i, a hmuh mi phaisa zong CITY FYM he an i tthen lai. Mah ti kumnga chung an kal tti hnu ah CITY FYM nih album pakhat an chuahpiak ve hna lai.