Victor Biak Lian: Ka diary: January 10, 2021, Ngeihchiatnak: Pu Biak Ceu (64) Ram chung ramleng hawikawm cingla rualchan u le nau vialte sin ah ngeihchiatnak thawngpang pakhat ka vun in thanh hna. Pu Biak Ceu (Indianapolis) nih tunai te ah a kan liam tak ee tiah kan theih. A mah hi thin cancer in a damlonak a sau pah cang.

Pu Biak a thei mi a hawi le le a riantuanpi (CNF) vialte ca ah cun Pu Biak cu kan thei zungzal ko lai. Keimah ca ah cun kapa he cousin an si i kapa Biak hei ti ding ka si na in, Pa Biak ti in ka hei auh ve tawn ko. 1988-2010 (?) tiang hi CNF ah rural development le a dang dang project hna ah rian a tuan mi a rak si. A kum a upa ve cang ca ah CNF in aa dinh hnu ah Malaysia ah a kal. Cuticun US ah refugee in a rak ra ve a chung le he. Kawlram a kiar khawh ti lonak hi kum 40 renglo a si cang.

1995 ah hin Kawl ralkap CNF sin ah minung 11 an rak lut i an hriam he, cu hna cu Delhi ah refugee sawkpiak ding ah a rak hruai hna i kan sin ah thlakhat chung kan rak thuh hna. 2003 -2008 Thailand kan um lio zong ah a rak kan pal pah lengmang zei maw an rian ah an rat tawn ah. Par Tha nu zong nih a tlaihchan ngai ngai i Indianapolis kan tlawn tawn zong ah Pa Biak va chawnh ta lo le va hmuh ta lo cu a sia a rem lo.

 

Mi thinlung tha a si i micung ah ziarngaih, nahchuahnak thinlung a ngeimi a si lo. Apawng um mi vialte nih an dawt an tlaihchan. Capo saih a thiam i mi hnorsuan phun in an lungfah ding biachim aa ralring ngai mi a si. Pu Biak chim tawnmi capo a si na in a hman tuk mi cu: mi zei maw khi bia an chim sual ruang ah or an tial sual ruang ah biahritarh maw si lo ah soisel an i huah ah cun “an chim hlan an ngai tuk te lai” a ti theu hna. Pu Biak, kan in thei zungzal ko lai ee! Anupi min: Pi Men Thluai (Indianapolis) A fa le: Joseph Cung Kam Thawng, Joshua Ram Tlung le Cung Za Nawl hna an si.

A u nau: 1. Saya Kyi Van Awi (Tleicia) 2. Rev Hlawn Tial (Tleicia 3. Sayamah Louis (Biak Chin nu Dallas, TX) 4. Sayamah Hniang Nawn (Hakha) 5. Rev Lawm Bik (Tokyo) 6. Thawng To (Tleicia) 7. Iang Khun (Hakha) 8. Biak Ceu 9. Lily Vanram nuam in a kan dongtu ding ah rak kal chung ko kun mu! Aa Vic

A thinak kong he pehtlai in Indiana Chin Baptist Church nih an taarlanghmi; Nulepa ulenau hna, Indiana Chin Baptist Church chungtel a simi Pu Biak Ceu (kum 64) nih takpum damlonak in nihin (January 10, 2021) zanlei 2:30pm hrawng ah a sertu Pathian sin ah zungzal ca in a kan dinhtaak. A nupi Pi Men Tluai le fapa pathum a rohtaak hna.

A chuahpi a ulenau hna cu Sayakyi Van Awi (tleicia), Rev. Hlawn Tial (tleicia), Sayama Karen Louis (USA), Sayama Hniang Nawn (Hakha), Rev. Lawm Bik (Japan), Pu Thawng To (tleicia), Pi Iang Khun (Hakha), le Lily (Hakha) hna an si. Ram le miphun ca ah nun thaap in CNF/A ah a rak lut i kum saupi ralbawi rian tiang a rak ttuanmi a si.

A luancia kum 2 hrawng in damlonak (thin le cuap cancer) nih a tlak i, siibawi te le chungkhar nih a tthabik in an conghhramh ko nain dam lei panh ti lo in a tu ah takpum in a kan tthen hi a si. Taantaakmi chungkhar le rualchan cingla ca ah thlacam rak kan bawm cio u. Ruak-thlah-nak ni le caan zeihmanh a fiang kho rih lo. A fian tik in thawng kan thanh tthan te lai. Zuunngaih Par cah a duhmi Rev. Hrang Cung Hnin (317-986-0760) sin ah thawngthanh khawh a si lai. Ngaihchiatpi buin, Pastor Lal Cung Awi (Indiana Chin Baptist Church)