Vice President Pu Henry Van Thio nih a theih ah a tha tiah ka ruah

Chin News

Vice President Pu Henry Van Thio nih a theih ah a tha tiah ka ruah..

Image result for president henry van thio

Chin miphun nih kan zanmang manh lo Vice President tuanvo a kan laakpiak mi Pu Henry Van Thio hi keimah pumpak in siseh, Chin miphun pakhat dirhmun in siseh ka upat.

Pu Henry Van Thio hi ka mi uar phun pakhat a si. A minung sinak in Lai pa ah cun mi leeklaak a si. Hihi miphun dang hna hmai i va dir ding ahcun a herh bak mi a si. Cun mi lungthiang, mi fel, mi zuam, miphun a daw mi, mi dingfel, Pathian aa bochan i a zatawk in a ral a tha mi a si tiah ka ruah. Hi ruang ah Vice President zong hi pek a tlak bak mi a si.

Mi cheu nih “Pi Suu nih Chinmi a kan zawnruah ca ah…” an ti mi hi a si lo, mah bantuk minung a kan pekpiak lo ah aho mizei dah an pek hlei hna lai? Cawisan chom mi kan si lo, Pathian nih a ruaram minung tialtung fang bang a kan thlak ve mi hrim a si ko.

Ka uar khunnak pakhat cu Vice President a tuan lio ah zeitluk in dah Chinram ka sersiam lai ti aa hmaithlak mi hi a si. Aa hmaithlak taktak ti a langhnak cu atu le atu a rak kan tlunhnawh mi nih a langhter. A tlung deng lai ti ruah hlan ah a rak tlun khawh lengmang mi nih hin a hnaakkar ah a kan tenh ti fiang tein a langhter. Zei ruang ah dah atu le atu a rak kan tlun hnawh? A langpar in a run kan tlangtlak ko lo? Amah theng rak tlun lengmang a herh maw? Anih hna cu vanlawng zong in rak tlung duh lo, ke bak in hi tluk Laitlang lam har ah mahti rak tlun lengmang cu a herh maw?

A ruang cu Chin ramkulh cozah nih fel in rian an tuan lo sual lai ti a phan ca ah a si ko lai. Atu le tu ka tlun ahcun an i ralring deuh lai i rian an fel deuh lai ti a ruah ca ah a si bik lai. Cucu a si awk zong a si. Asinain mah tluk in a rak kan vehvat bu ah Chin ramkulh cozah le company pawl an riantuan ning zeidah an lawh? An i hlei deuh maw? Pu Henry Van Thio nih hin zeitindah a hmuhning a si ve hnga? Khuami hmuhning ahcun aa hlei ruam lo.

Pu Henry Van Thio nih nihin Chin ramkulh cozah nih an rian an chei maw chei lo? Rammi he an karlak zeidirhmun dah an lawh? Cozah riantuan pawl le rammi karlak ah ziknawh eihmuar a tum deuh maw? Cozah nih thanchonak rian a pek mi a tuantu Chinram company pawl an riantuan ning zeidah an lawh? Rian an thiam deuh maw? An fel maw? Zeitluk in an kutzung a chiat le ri khiah mi ning in an tuan maw? Zeitluk dah an i hleep? An tuah mi zeitluk in a chiat? ti pawl hna hi tutan a rak tlun tal ah hin a fiang cang hnga maw?

Hi pawl fiang lo in tlun thlorh i a rak tlun ding cu a caan a paam tuk lai i a rak tlun tawn mi zong hi “Hlawh leng sia khaal” sawhsawh a si lai i rammi zong kan sung tuk lai.

Cucaah rian lawng rak tlun hnawh ti lo in riantuantu tu hi rak tlun hnawh deuh cang sehlaw a rian hma a kal deuh cang lai tiah ka ruah. Zeicatiah a tlun nakding lam le kalpah zoh ding mi inn le lo le lam lawng remh an si i a phanh lonak le a hmuh lo mi rian vialte cu Baibal ca nih “thuh mi rothil” a ti bang chim awk um lo in daithlanh an si.

Cun hi zong hi ruah awk ngai a si cang mi cu, bawi tlun lai poh ah bawi nih ‘tlun zoh zeidah ka phurh hna lai’ ti le, khualei nih ‘zeidah kan hal lai’ ti lawng ruah a si tawn. Bawi hi a fim deuh ah ruat hna usihlaw annih tal nih cun ‘riantuantu le rian zohfelnak (monitoring) tuah hi kan rian a si’ ti tal cu an fian awk a si cang. Hihi an tuah mi a tlawm ngaingai. A bik in cozah thar bawi pawl hi khuate an tlun tik ah leiba kan cham hna ti phun in tlun zoh phurh ah a tlung mi an lo. A taktak cu Khuabawi thawk in an cunglei riantuantu vialte an rian an chekhlat hna i a fel lo mi cu ralrinnak tiang an pek thluahmah hna awk a si.

Hihi Vice President Henry Pu Van Thio nih nihin tiang a caan chung ah a chambau tiah ka ruah. Khua le ram a dawt i Chinram sersiam taktak aa timh ahcun hruaitu pakhat nih a riantuan ningcang a thlen a herh tiah ka ruah. A ruang cu amah hi mi tha, mi lung thiang a si ca ah hi pawl hi aa dawh lo, mithmai kan i khaap lai lo a ti ca ah a si sual hnga maw? Tutan a tlun tal ahcun hihi tlawmpal tal cu fiang sehlaw Chinram sersiamnak ah zeimawzat cu a bawmh lai tiah ka ruah. (Pa Pui)

Ref: The Hakha Post

Leave a Reply