Vice President Pu Henry Van Thio A Chuahsemnak Tikir Khua A Phan, Khua Mi Sinah Zei Biadah A Chim? Myanmar rampi Vice President a ttuan lio mi Pu Henry Van Thio cu nizan 2/13/2020 ah a chuak semnak Tikir khua ah zankhat riak in a va tlawng ta. Zankhat a cam chungah khuami hna he hmunkhat ton biaruahnak an ngei hna. Tikir khua mi hna he ton biaruahnak an ngaihnak i Vice President Pu Henry Van Thio nih a chim mi.

keimah hi Kawlram chungah a bawi bik pathum/palinak dirhmun ah a um mi ka si. Cu dirhmun a dirmi ka sinain uah le zumhnak kia ngei lo. Cucaah nanmah zong zumhnak lungthin ngei hlah u. Cun, pakhat le pakhat karlak ah chiatnak lam in ertaunak ngei hlah u. Cu lawng si loin keimah timi lungput zong ngei fawn hlah u, cu bantuk ruahnak lungput nan ngaih ahcun dawtnak thinlung a zor. Cu pinah mah le mah thangtthat/cawisannak zong ngei hlah u, mah le mah thangtthat/cawisan cu tha a ba.

Keimah timi lungput ngaih cu kan biak Pathian zong nih a duh mi lungput asi lo bantukin Pathian nih a duh bikmi cu amah cawisan hi asi,”tiah Tikir khua mi he ton biaruahnak an ngaihnak ahcun bia a cah tak hna. Tutan ah Vice President Pu Henry Van Thio Chinram a tlunnak a ruang hi a ra laimi Thantang ah tuah ding mi CND puai ah khuallian tlung ding an si ruangah a hlan ken in a rak tlun chung nak si,”tiah chim le theih si fawn.

Relchih: INDIANAPOLIS AH PU ZO ZAM: Chin Community of Indiana (CCI) nih Avoi 72-nak Chin National Day khualian (Chief Guest) ca i an sawmmi Pu Zo Zam cu tu zanlei February 13 ah damte’in Indianapolis a rak phan tiah theih a si. Pu Zo Zam hi CCI upa pawl nih Lai/Chin thuam he bak Indianapolis Airport ah an va don ti a si.

ZIAH nikum ah CCI nih Pu Ngaisak an sawm cang. Tu kum ah Pu Zo Zam tu an sawm ṭhan. CCI hi Chin party pawl lawng maw an ṭanh hna ti i a ruatmi um khawh a si. Ni kum zong, tu kum zong ah CND khuallian caah Chin state Chief Minister le minister dang pawl hi sawm an timh tawn hna nain an rian tam ruang le ramleng tlawn ding an si thiam lo caah Chin party upa pahnih tu a kum peh i an sawm nak hna hi a si tiah CCI upa sin in theih a si.

Indianapolis um Chinmi lakah hin Chin National Day a dangte i a tuahmi hi Tidim lei kan unau Zomi pawl lawng hi an si. Myone dang poh cu CCI hruainak tang ah hin an itel dih tiah theih a si. Pu Zo Zam tal nih hin a dangte rumro i ai pheo mi Tidim lei kan unau ZOMI ai timi pawl hi CCI he CND hi tuah ṭi tawn dingin biacah ta hna seh law a ṭha hnga. Ref: The Chin Voice