Chin United FC le Thantlang i Hotel le Yangon Water Bus ngeitu Daw Tint Tint Lwin (Tint Tint Myanmar Group of Companies hruaitu) nih a leiba (772,13,850) cu February ni (28) hlan ah a pek thlu lo ahcun Biaceih zung ah taza kan cuai cang lai tiah tuchun ah acozah thawngzamhnak hmang in cathanh an chuah tiah theih asi.

Hiti bantukin thawngthanhnak an tuahmi hi Petro & Trans Group of Companies Limited i Managing Director U Zin Ko Lin fialnak in sihni U Than Tun min in ca an chuah hi a si. Ca an chuahmi chungah “Tin Tint Myanmar of Group Of Companies i Chairman Dawt Tin Tint Lwin nih a ngeihmi Water Bus tilawng HNA caah hman dingmi desil cu Pero & Trans Group of Col.Lted ta a ba in a hman, thla dih hnu ni(10) chung ah kan pek ṭhan hna lai tiah biakamnak he a rak lak i aluancia kum 2018 September ni (4) in December ni (9) tiang a ba in a lak hi a si. H nicaan chung ah a hmanmi hi a dihlak in Kawlram tangka (772,13,850) a si i kum 2019 August ni (15) hlan ah a za tein kan pek dih hna lai tiah minsen thutnak zong a tuah nain a leiba cu an kan pe hlei lo.

Cu ruangah 2020 kum January ni (25) ah Company nih Sihni sinin Tint Tint group sinah February ni (7) hlanah leiba cham dih in theihternak ca kan pek nain Mayangon peng ah a zung a thial cang an tiin Yangon cakuatnak zungin theihternak ca kan pekmi cu an rak kir ter ṭhan.

Cucaah Dawt Tin Tint Lwin i Phone ah voitampi kan call nain kan phone call a kan thah khan lole kan phone call a tlai duh lo i chawnh khawh loin a um. Cun na leiba hna hi kum 2020 Februay ni 28 hlanah na cham dih lo ahcun Biaceih zungah taza kan cuai cang lai” tiah an langhter.

Tint Tint Myanmar Group of Companies nih a sak cuahmahmi Thantlang Hill Resort hi eka (11) a kaumi a si i ting (10,000) dih dingin timtuah a si. Cun company ngeitu Daw Tint Tint Lwin hi Vice President Pu Henry Van Ṭhio chungkhar hna he a neihniam ngaimi le a ngamhtlak ngaimi an si i Yangon Water Bus tilawng zongah Henry Van Ṭhio te chungkhar hna he tiin an cuang ṭi bal cang.

Cun Vice President Pu Henry Van Ṭhio nupi Pi Anna Hluan zong aluancia kum 2019 Hakha le Thantlang a kal tanah Dawt Tint Tint Lwin nih a zulh ve i Vice President Pu Henry Van Ṭhio te chungkhar nih Christmas an tuah caan ah Dawt Tint Tint Lwin hi an sawm lengmang tawn tiah an langhter.

Note: Falam holh in an ṭialmi kan lehchawmmi a si tikah kan i palhnak tampi kho men nan kan theihthiamnak lai kan in nawlpat duh hna.