RAM RUM ZONG NIH KAWLRAM AN TLUK LONAK: Mirang nih sautuk an rak kan uk, cuhnu ah ralkap nih sautuk an kan uk tthan. Kanram cu siifah ah vawlei cungah minthang a si. Tlamtlinlonak tampi a ngei, ramdang a tluk lonak tampi a um. Asinain ram dang tampi nakin a tthat deuh nak a um ve. Van zoh hmanh!

1. COZAH SIZUNG VIALTE FREE BAK A SI: Ramdang ahcun medical insurance timi, ngandamnak caah thla chiarte peekmi, phaisa kha a um. Cozah nih an tuah. An zawt lo zongah kha phaisa kha thla chiarte cozah sinah an peek. A pe mi hna cu an zawt tikah cozah nih man lo in an zoh ve hna. A man an liam mi zawtnak le siiai man a um zongah man tlawmte lawnglawng an laak hna. Medical insurance a pe lomi ca ahcun sizung hi kal ngam ding zong a si lo, aman hi van a tawng. Kannih kan Kawlram cu medical insurance peek a um lo. Kan ngandamnak caah thlachiar in cozah sinah peekmi zeihmanh kan ngei lo.

Asinain cozah nih cozah sizung ahcun alak bakin an kan tlawp dih. Sibawi zoh man free a si. Nurse cohkhenh man free a si. Room service free a si. Ihkhun le ihnak khan man free a si. X-ray, ultrasound, CT, endoscophy, ecocardiogram, le sizung nih an check khawhmi thi check le zun check vialte free a si. Si an ngeihmi zong free a si. Kan ram hi tluk i cozah phaisa an ngeih lo he hi thil lianngan an tuah khawhmi hi ram dang mi zong an khuaruah a har ngaingai.

2. CACAWNNAK VIALTE FREE A SI: Ram danga hcun an fale cacawnnak ahhin phaisa tamtuk an dih hna caah fa zong tam an ngei ngam hna lo. Asinain a siifak ngaimi kan ram ahcun cozah siangin pohpoh ahcun cachimh man (tuition fee) an la lo, luh man (admission fee) an la lo, siangin le thilri an hmanmi man (facilities fee) an la lo. Cunpinah textbook vialte Kawlram pumpi free in an peek dih hna. Hitluk i a siifakmi cozah nih hitluk thil ttha a tuah hi cu ram dangmi zong an khuaruah a har ngai.

3. BIAKNAK A ZALEN NGAI CANG: Kawlram hi Buddhist ttawnnak ram pakhat a si nain biaknak dang hi zalennak an kan peek ngaingai cang. Khrihfa hi kan ruahnak a bi deuh i apartment (teih-khan) hna i i pumh ti bantuk hna kan hman caah buainak a chuah pah tawn i a si. India hna khi democracy ram bak a si kan ti ko nain atu Bangalor ah hna ah Korea missionary pakhat hmanh an um ngam ti lo. Missionary an thah lengmang, an fir lengmang hna i an um ngam ti lo. Atu ahcun Laimi nih Yangon pawngkam khuate le sang vialte ahcun pumhnak kan tuah lonak hmun a um ti lo. Laimi, Khrihfa zong kha Vice President hna an kan ttuar ter cang. Kan Vice President zong nih presidential house bak ah Christmas hna a tuahpi khawh cang hna. Christmas in president campus!

4. BIAKNAK ZOH LO IN MITHI RUAK VIALTE FREE IN AN KAN PHURH PIAK DIH: Laimi hi Khrihfa kan si nain free in mithi ruak phurtu motor service a tuahmi kan um rih lo. Lai Chiat-tthat bu zong hi hmunkip ah an um nain an tuah kho lo. Tuah zong an i tim lo. Laimi nih tuah hna selaw petrol man tal cu mithi mi hna chung kha kan hal hna hnga. Kawl nihcun free bakin mi zei a thimi poh an inn in mithi chiahnak tiang, mithi chiahnak in thlan tiang free ban in phurh piak a si. Cucaah Khrihfa kan thih ahcun Buddhist rumro kha bomhnak kan hal tawn hna. Ram rum hmanh ah hihi cu a tuah khawh lomi ram an tam.

5.THI HLU TU AN TAM: Kawl cu an theih bal bak lomi zong khi an thi an hlu tluahmah ko hna. Hmailei i an hmuh ti lo dingmi zong kha an hlu ko hna. Laimi cu chungkhat unau zong kan i hlu duh lo. A hlu van chim lo, a cawk zong in an siang hna lo. Laimi pakhat nih a thi an hlu sual ahcun a mithmai zoh hau peng dng in ai tuah lai. A lak in thi hlu kho tu kan ram ah an tampi mi hi kan ram a tthatnak pakhat a si tthan.

Credit: Dr Aung Myint Thang