Rev. Dr. Benjamin Khamh Bawi: Fianter Than Herh Tilo In A Fiang Ko. Aug. 4/2022. Mi cheukhat hna nih Muslim an pathian min cu Allah asi. Khrihfa Pathian min tah ahodah a si? tiin mi thinlung buaiter an timh tawn. Allah timi asullam cu, “Pathian,” tinak thiamthiam asi ko. A min kongah fianter than hau loin a fiang cia cang ko.

Pathian min (16), Jesuh min (100) hna le Thiang Thlarau min (32) ka langhter cang. Mah min vialte hna lakah khin Jesuh timi min lawnglawng khi nu nih a hrin hnuin min pekchawm/ sakchawm mi min a si. Zeicahtiah Mi Fapa in a run caah a si. A dang min vialte hna khi cu an sinak min (Rent-ရာထူး) min lawngte an si dih hna.

Pathian min hodah a si timi biahalnak cu Adam a min hodah asi (or) Evi a min hodah asi? timi biahalnak he aa khatmi a si. Adam timi cu, “pa,” tinak a si i, Evi timi cu, “nu,” tinak a si. Pathian nih “pa” khat lawng a ser lio le “nu” pakhat lawng a ser lioah khan cun min dang a herh tilo. Pa or Nu ti-ah cun a za diam ko. Cun Adam le Evi kha an pahnih in Adam tiah a auh than hna.

(Gen. 5:1,2). An pahnih fonh in Adam tiah auh an si nain pa kha nu asi lo i nu zong kha pa a si ve lo. Pum khat am si caah an pahnih fonh in Adam tiah auh an sinak asi. (Gen. 2:24). Asinain fapa le fanu dangdang an hun hrin tikah cun an min an sak cang hna. Adam a min cu Adam asi ko. Pathian a min cu Pathian a si ko. Fianter Than a hau tilo. Cu Pathian cu bawi Vialte Bawi a si caah Bawipa (Jehovah) tiah auh a si.

Cubantuk in Pathian cu Amah Lawng Lawng Pathian a si caah a dang tein min dang sak a herh ti lo. Pa le Fapa le Thiang Thlarau, Mi Pathum In A Langmi Pathian chungin A Pahnihnak “Pa” Asimi Pathian Kha Jesuh Tiah Min Pek/ Min Sak Asi. Zeicahtiah A Ruang cu Minung Sinak Aa Hrawm Caah Asi I Jesuh Timi min asullam cu Khamhtu (Jeshua) tinak a si. Kan Pathian min cu Jesuh asi kan ti-ah cun kan Pathian min cu Khamhtu a si tinak a si ko.

Kan Pathian min ah Jesuh timi min aa tel taktak ko. Fapa Pathian a min 100 chungah Jesuh timi aa telve taktak ko. Jesuh timi min hi Fapa Pathian a min hna lakah aa telve mi min pakhat a si. Jesuh cu Pathian asi tihi Biatak cawnpiaknak a si, sihmanhsehlaw Pa le Thiang Thlarau pum dang tein an um tilo, Pathian timi cu Jesuh mipum pakhat lawng asi ticu cawnpiaknak dik lo Baibal cawnpiaknak he aa kalhmi cawnpiaknak a si.

Jesuh cu misual khamtu caah Pa Pathian nih Vawlei a ser hlan piin misual khamhtu/ a thisen in tlanhtu caah a rak timh chung cangmi misual aiawh in Vailamtahnak cungah kan sual leiba a chamtu, athisen in Pa Pathian hmaiah tlanhnak serpiaktu. (Efe. 1:3, 9; Rom. 3:25; Efe. 1:7; Heb. 9:12; 10:10; 1 Tim. 2:5,6; 1 Kor. 5:21; Rom. 5:6-9; Kol. 2:14)