USDP: Chin Ramkulh Mahte Uknak le Mahte Tawlrelnak Nawl Hmu Ding in Phunglam Kan Ser: Chin ramkulh nih mahte uknak nawl le mahte i tawlrelnak nawl a hmuh nakhnga i zuam ding in USDP nih phunglam “Mu-wa-da” pawl kan sermi an um hna, tiah Chin ramkulh USDP biachimtu Salai Khuai Yan nih a chim. Chin ramkulh USDP nih a chuahmi baihalnak video tawite ah a cunglei bang in Chin ramkulh USDP biachimtu nih a langhter hi a si.

Salai Khuai Yan nih, “Chin ramkulh chung ah a ummi le Chin ramkulh leng ah a ummi Chinmi vialte ca ah phunglam kan sermi hna an um ko. Chinram cu Chin miphun ta a si bantuk in Chinmi nih mahte uknak nawl le mahte i tawlrelnak nawl an hmuh nakhnga riantuan ding in phunglam pawl kan ser hna,” tiah a chim. “A pahnihnak ah, rammi pumpak pakhat cio nih an tinco awk a simi zalong tein khuasaknak, buaktlak tein covo ngeihnak le upadi hmai ah thleidannak um loin i ruannak timi rammi covo pawl Chinmi pumpak pakhat cio nih an tinco khawh nakhnga i zuam ding in phunglam pawl kan ser hna,” tiah a chim chap.

A pathumnak ah, Chin miphun pawl kan i fumtom khawh nakhnga USDP nih kan i zuam lai,” tiah a chim i, “A palinak ah, Chin miphun kan sinak “Identity” a tlau lo nakhnga le tthanchoter nakhnga fak khun in kan i zuam lai tiah phunglam pawl kan ser hna,” tiah Salai Khuai Yan nih a peh chap.

Cun, a donghnak bik ah, chan tiluan a zuldawi khomi Chin mino pawl kan tunmer khawh nakhnga kan i zuam lai tiin phunglam pawl kan ser hna,” tiah a langhter. Atutan hi Chin ramkulh USDP nih Chinram le Chin miphun ca ah tuanchuah ding in aa timhtuahmi/aa zuam dingmi kong he pehtlai in phunglam an ngeihmi pawl a voi khatnak bik zapi theih in an langhter a si.

2020 thimnak ah USDP he aa zuamcawh bik dingmi Chin ramkulh NLD le CNLD belte nih Chinram le Chin miphun ca ah an ttuan dingmi/an i hmaithlak bik dingmi rian pawl le cu rian pawl ttuanchuah khawh an si nakhnga zei bantuk phunglam pawl dah an ngeih timi zapi theih in langhter a um rih lo. USDP. Credit: Mai Daut Mawe Tal