USA Laimi chungah Covid-19 zawtnak hi a tum lei kan phan tiin ka hmu rih lo. Kan karh leitu kan si hnga maw tiin ruahnak ka ngei. Cucaah iralrin thiam kan hau rih ko. Mah Covid19 zawtnak nih a tlunghmi hna sinah theihter kan duhmi hna cu hi nan zawtmi hi zeihmanh ningzah ding asi lo, nanmah sual le palh ruangah nan ngahmi asi lo ti hi a si. Nanmah lawng mah zawtnak in a zawmi nan si hrim lo. An tampi ve ko. Zeitikhmanh ah kan dam ko lai timi ruahchannak ngei peng uh. Nan caah thlacamtu le an dawtu an tampi ko ti hi thei peng uh.

Cun khat lei ah nawl kan duhmi hna cu nan sia a rem, cun caan hna nan pek khawh ahcun zangfahnak tein Covid-19 zawtnak in nan zawt cuahmah lio ah nan lungthin zeitin dah a um, zeidah a har, zeitin dah thazang nan lak tibantuk pawl nan hmuhtonnak tete zong nan kan chim khawh ahcun mipi caah a thahnem ngai lai. Nain nanmah nawl bak a si ko, mah lungtho lawngah tuah ding a si ko. Hnek a um lo. A dam cangmi Pu Chansawlin Zaathang nih a hmuhtonnak a kan chimmi zoh tikah zeitlukin mipi caah a that ti theih khawh a si. A cung ah kan i lawm taktak cio lai dah ka ti. Credit: Salai Z T Lian

Pu Chansawlin Zaathang nih Covid-19 in a a zawmi pa nih damnak a hmuhnak kong a chimmi rak ngai. Video timi rak hmehpiak.

Tuchun US dirhmun rak rel chih: US Covid-19 Update: 04/20/2020. Tuchun tiangah US ah a thimi, minung 39015 an phan. Ni hnih chungah minung 1876 an thi. A zawmi 738923 an phan. Ni hnih chungah a zawmi, 29722 an i chap. Minung 60000 tiang cu kan thi kho tiah President Trump nih a chim. Tutiang ah zawtnak a chek cangmi 4.3 million renglo an si cang. Minute panga lawng a raumi, Virus testnak thilri a um cang caah nifatin minung a sing in an chek khawh cang hna. Nizan tiangah adam thanmi, 68285 an si. Ni hnih chungah a dam thanmi minung 8288 an i chap ve. New York khua pakhat lawngah minung 17671 an thi cang. Ni hnih chungah ah New York i a thimi, 534 lawng an si. A zor ngai cang ti khawh a si. New York khua pakhat lawng i a thimi minung hi US ram pumpi a thimi 40% tluk a si.

President Trump nih State cozah le business pawl onnak cu White House taskforce hna nih an sermi guidline ning in mah le state cio nawl a si lai a ti bantuk in hawi hlan bik a ong dingmi state cu Texas an si lai. State pakhat le pakhat ah zawtnak a faak deuhmi le a din deuhmi a um caah an on caan ikhah dawh a si lo. Asinain state pakhat le pakhat a neihniam mi pawl cu hmun khat ah on ṭi dawh an si. Hawi hlan bik ah a ong dingmi state cu 29 hrawng si dawh an si. Michigan, Ohio, Wisconsin, Minnesota, Illinois, Indiana le Kentucky hi hmun khat ah on an timh. New York, New Jersey, Connecticut, Pennsylvania, Delaware, Rhode Island le Massachusetts hi hmun khat teah on an timh ve.

White house taskforce hna nih press conference ah US ram pumpi on ṭhannak dingah guideline an tuahmi vialte an thanh cang. US on ṭhannak ah a herhmi resource vialte an pek hna pin ah federal cozah nih on ṭhan dingmi cu, phase one, phase two le phase three tiah an then piak hna. Phase one hi cu a thlengmi tlawmpal te lawng a si. Phase Two le Phase Three hi a biapi ngaimi an hung si. Phase one ah minung 10 tiang i pumh khawh a si lai i, gyms pawl zong on khawh a si lai.

Phase two ah hin minung 50 tang i pumh khawhnak le sianginn, restaurent, bar, daycare le camps pawl on khawhnak a tel lai ti a si. Sport zong zeimawzet cu i celh khawh a si lai. Phase Three ah hin zalong tein rianṭuan khawh a si lai. Sizung zong on ṭhan a si lai i, mizaw zoh zong a ngah lai. Zalong deuh in khual zong tlawn khawh a si te lai. Asinain Social distancing hi cu a um rih lai.

President Trump nih Tuluk cozah nih thuh nawhmi ngei lo tein coronavirus a thawnak finghlang tein a chim a hau, coroanavirus cu Wuhan lab pakhat i a zuh le zuh lo US cozah nih biatak tein hlathlainak kan tuah lio a si a ti. Japan nih Tuluk ram i auto motors sernak sehzung pawl cu Japan ram ah kir ṭhan ding in nawl a pek. Germany nih coronvirus ruangah an ram nih a sunghmi vialte cu Tuluk cozah nih a liam a hau tiah a ti. Uk le Australia zong nih Tuluk cozah cu biatak tein hlathlainak kan tuah a herh tiah an chim ve. Credit: Salai Lairamthang