USA Indina A Ummi Chinmi Kan I Ralrin Taktak Aherh Cang Hih Ṭih A Nung Chin Lengmang. Atu lio ramleng khualtlawn hi an ttihtuk lio si. Aruang cu Corona Virus kha ramkip ah an i tlawnpi chih caah asi. Atawi fiannak in chim ah cun China lei Vanlawng an phih caah South Kore lei deuh in zuan asi. Atu lio South Korea ram hi khuacimui tak tak in an um cang. Biakinn tiang zong an i pum ngam ti loh, a tlangpi in zawtnak hi pumkhomhnak deuh in an i chonh bik ee tiah an ruah. South Korea ram ah minung athimi le case kong cu international news ah rel cok lo in an phozar cang.

Von chimduh bik mi cu South Korea lei transit in Laimi a tlungmi kan um le.. Cu hraw cu va um hlah seh, virus hna a kan phurh ah cun Laimi i pumh lo le abu in i ton lo kan hau lai i cozah nih khuacimui in a kan tlangtlak te hau lai. Rianttuan ngam lo le pakhat le pakhat i don le thlah ngam lo dirhmun kan phan kho. Laimi cu neihniamtuk in a thudir mi miphun kan si caah kan i ralrin bak khi a hau.

Atu lio khual a tlawngmi an rak phak tik ah fimkhur ngai in um kan hau lai hih. Cun kan mah hrim hrim zong khualtlawn lo bak kan hau. South Korea transit, China ram transit, Thailand le Singapore transit zong a him bak lo mi si. Ka thinphang ngai ko.Credit-Salai Cung Khenglawt

Coronavirus Nih US Ralkap Pakhat Avoikhatnak ATlunh Ve Cang. South Korea ah ralkap rian a tuan lio mi US ralkap pakhat cu coronavirus nih a ngei i, ralkap camp in a lenglei ah thlop dingin an chiah cang, tiah Tuesday ah khan ralkap lei nih thawngthanhnak an tuah. Daegu khualipi pawng i Camp Carroll ahcun kum 23 ralkap pa cu an zohkhenh cuahmah lio asi.

Cuka hmun cu coronavirus nih a chonhmi hna an chiahnak hmunhma a si. Tutan zarh a awtka ah khan hi ralkap pa hi cuka hmun cu a vung pal bal, ti a si. US ralkap lakah a hmasabik coronavirus nih a tlunhmi a si. A tangmi ralkap pawl zong COVID-19 an ngeih le ngeih lo thatein zohfel an hau, tiah US Forces Korea (USFK) nih an chim. COVID-19 a karh lei panh lo dingin le US ralkap pawl chonh kho lo dingin baitakthlak in USFK nih thazang chuah an i tim.

A tu bantuk i zawtnak chonh khawh a si mi ruangah hin kaphnih ralkap raltuk cawntinak tuah tuk ti lo dingin kaphnih ralbawi pawl ton biaruahnak an ngei ti hna. Kum khat chuanthluak raltuktinak an tuahmi cu tutan zawtnak nih hin a van hnursuan ngai, tiah US Defense Secretary Mark Esper le Korean Defense Minister Jeong Kyeong-doo nih an chim. South Korea ah ralkap rian a tlaimi US ralkap hi minung 28,500 hrawng an si i, North Korea hrocernak bia le hla vialte khamtu dingah a biapi ngaimi ralkapbu an si. US ralkap nuhmei kum 61 zong coronavirus nih a tlunh, tiah USFK nih Monday ah khan thawngthanhnak an tuah. Cu le cangka cun an velcheh ah a ummi ralkap pawl cu ralrin an hun pek colh hna.

Daegu lawng bakah mizaw 134 an um cang. Minung 19 hi khuakiangkap mi an si hna, tiah Wednesday ah khan South Korea’s Centers for Disease Control and Prevention phu nih an chim. Nihin tiangah a thimi hi minung 11 an phan cang, tiah South Korea official nih an chim. An ram pumpi i coronavirus nih a tlunhmi hna hi minung 1,146 an phan cang. Hi zawtnak hun dohnak dingah tutan zarh hi a biapi ngaingai mi can a si, tiah Prime Minister Chung Se-kyun nih Daegu City Hall ah a chim.

American mipi zong a herh sitsai lem lo ah cun South Korea lei hi hunkan tlawng rih hlah u law a tha ko, tiah CDC lei nih ralrinnak an pek hna. “Hi bantuk zawtnak hi a um peng rih ko lai maw?” timi biahalnak nakin “kan ram chungah hin minung zeizat remruam nih dah hi zawtfahnak hi an intuar te lai?” timi tu hi hal ding a si. Vawleicung pumpi ah coronavirus nih a tlunhmi hna hi miung 80,000 hrawng an si cang i, cu hna lakah cun minung 2,700 hi a thi mi an si cang. France, Italy le Algeria hei ti bantuk ram ah cun coronavirus a nehle nang an kawl cuahmah lio pi a si.Foxnews/Chelsea Bawi (Global Rawn Chin Media)