US Visa Zeiruang Dah Kan Sung Tawn? Salai Lungthli Tum

Theihtlei

US Visa Zeiruang Dah Kan Sung Tawn?

Image result for salai lungthli tum
US tlawn ka duh’ tiin aka chawnmi tam deuh cu US visa a sung bal ciami deuh an si. Laimi lakah US visa a sungmi an tam hringhran cang. Zeiruang bik ah dah a si? Khaw-sa(letter of invitation) kan i bochan tuk sual tawn. A ngaingai ti ah cun visa interview ah khaw-sa an hal bal lo. US cozah hrim nih khaw-sa hi ‘a herh lo’ tiah Yangon US Embassy website ah siseh, Department of State website zong ah fiang tein an tial.

Visa sungh tikah khaw-sa tial piaktu mawhchiat le thangchiat kan hmang theu, ‘tha tein khaw-sa an tial lo ruang ah visa ka sung’ kan ti theu. Hihi a dik lo tukmi a si. Khaw-sa ruang ah visa sungh si loin ‘US ah a tang beh sual lai, cozah harnak a kan pek sual lai’ tiah embassy riantuantu nih an in zumh lo caah visa an in pek ngam lo a si. Zeidah biapi bik an zoh kun?-Visit visa pek ding caah biapi bik in pathum an zoh, US Department of State website ah fiang tein an langhter ko. Cu hna cu:

(1) Myanmar ah caan saupi kaltak thai awk a tha lomi nupi le fale, nulepa le zohkhenhmi chungkhar (family ties) an um le um lo an zoh. Caan sau kaltak awk a tha lomi family member an um ahcun ‘visa case’ a tha ngai, visa ngahnak ding chance a tam.

Image may contain: 1 person, text

(2) Caan tawite lawng kaltak khawhmi, caan saupi kaltak awk a tha lomi rian(employment) a ngei le ngei lo an zoh fawn. Company ngan pakhat khat ah rian na tuan asilole company or business pakhatkhat a ngeitu na si ahcun visa ngahnak ding chance a tam tuk.

(3) Ngeihchiah chawva tampi na ngei le ngeilo(mirum na si le si lo) an zoh rih. US cozah nih an ram ah mirum luhter cu an duh tuk, mirum tourist nih US sipuazi caah thahnemnak tampi an chuahpi caah a si. Ngeihchiah chawva cu inn licence, vawlei licence le bank cauk in langhter khawh a si. DS-160 form fill-up lio zong ah phaisa ting thong in ka ngei tiah phit khawh a si, interview tikah bank cauk in tet-te piak khawh a si ko.

A cung pathum lakah 2nak le 3nak na tlinh ko ahcun visa sungh a har ngai. 1nak cu mi tampi nih tlinh cio a si ko caah visa biachahnak a petu cu a si lem lo. Kal ai timmi a kum zong a biapi, kum 25 tang mino a rummi an um theng lo caah visa ngahnak ding chance a tlawm ngaingai. Kum 30 cung chance a tam deuh. Kum 30 tang si ahcun student visa in sawk ah visa ngah a fawi bik. US le UK visa hi ngah a har bik a si, nain ningcang tein kan sawk piakmi tam deuh cu visa an ngah cio ko. Laimi tampi kan ruah bantuk cun a harmi a si lem lo.

Credit: Salai Lungthli Tum

Leave a Reply