USA Khuasa Chin mi hna, na dam lo, lufah le tlangrai, khuasik bantuk in na um men ahcun Sizung rak kal hrim hlah. A tu lio cu mizaw paohpaoh Covid-19 zawtnak in lunghrinh an si caah Covid-19 lunghrinh a simi mizaw he aa naihniam nak ah test nak tuah a si caah, Sizung vun phak bak in Covid-19 zawtnak i chawnh khawh a si.

Hi bantuk hin kan mah Laimi pakhat zong, ka Lufak a ti i Sizung ah a va kal nain Covid-19 na si kho tiah Sizung an riah ter nak in a tu hi Covid-19 zawtnak a ngei taktak ve cang i a dirhmun zong a ttha lo ngai tiah theih asi. Hi kong hi kan mah Laimi pakhat nih siaherhnak te he ca an rak kan kuat mi, mipi ralrin nak caah rak share law tiah an kan fial mi asi. Zapi theih in mizaw min le a chungkhar, a khua cu langhter a duh lo caah cakuat a rak tial mi lawng ka rak langhter lai.

“Ka miphun hawi sin ah siaherhnak he hi thawng hi ka zamh piak law ka duh. Ka naupa hi rian a ttuan a rak lawi in ka lu a fak, ka dam set lo a ti i Sizung ah sii cawk ding hal ah a kal. A si nain Sizung lei nih cun tulio cu Covid-19 hrik a tam lio a si caah check tuah lawlaw na hau, ni (14) chung cu Sizung ah result a chuah hlan chung na um lai an ti i ka naupa zong nih cun a el ngam hna lo ruang ah Sizung ahcun a um. A si nain Sizung a um chung ah ka naupa hi a zual bantuk a si cang. A tu hna hi cu Siizung a umnak zong ah kan va vehvet kho ti lo, Sibawi te nih zoh zong an kan sian lo. A ruang cu a thisen an test i ni (14) chung Sizung na um lai anti ahhin Covid-19 zawtnak a ngei mi zong Sizung an um ve, cu caah an mah sin cun zawtnak hi aa chawnh a si ko. A mah hi a Lu a fak sawhsawh, a tak zong a sa lo nain Sizung a phak hnu cun sual hma ngai dawh a si. Cu caah USA a um mi, kan Chin mi unau hna cu dam lo men ah Sizung kal hrim hna hlah seh ti ka duh ko. Sizung an kal nak ah zawtnak hrik i lak khawh a si. Ka sia a herh tuk caah ka rak tial mi a si. A rem na ti ahcun mipi sin ah ka tar piak te” tiah a rak tial mi asi.

Atu hi USA ah a um mi Kawlram mi chung in Covid-19 in a thi mi minung pahnih an um ve cang tiah Mizzima Burmese News nih a tarlangh ve cang. Mizzima nih a tarlangh ning ahcun zawtnak a ngei mi dang zong an um len rih nain Sibawi te nih an min le an sining langhter an duh lo tiah a langhter fawn. Cu caah USA a um mi Laimi chung in zawtnak raichia tamtuk nih kan i ton sual lo nak hnga, dam lo men ahcun Sizung fuh hrim hna hlah usih. Credit: Laikokekjournal