Covid-19 zawtnak le DFW area Laimi riantuannak company cheukhat thawngpang. Tuzarh ninga ni ah khan Western Extrusions (Carrollton ) ah Covid-19 zawtnak a ngeimi an hmuh tiin email a ka kuatu nih a ka thanh. A min cu kan thanh kho hna lo nain zumh tlak minung bak a si. Mah company riantuantu minung pahnih sinah thawngpang hlet hnu ah email in thawngpang a ka pekmi hi a hmanmi a si ko tiin fianternak kan rak tuah hna.

Nai zongah khan Laimi tampi tuannak Kraft foods company (Garland, TX) ah riantuanmi pakhat cu Covid-19 zawtnak an hmuh ve ti a si. Covid-19 zawtnak hi kan kiangkam a phanh cuahmah ve cang caah iralring thiam taktak le humhimnak caah hma biatak tein lak kan hau cang. Laimi tampi tuannak a si caah ahleice in iralring thiam kan hau,abikin ngandamnak tha lomi le tar ngeimi hna ca hrim ah iralring taktak kan hau. A herh lo ah i lengkai lo ding, kut tha tein i tawl pah lengmang ding a si lai.

Cun, na thawchuah na harh, na khuh na khuh ,na tak a linh le na hrom a fak ahcun Covid-19 zawtnak na ngei maw/ lo tin na chek ah a tha. Na cheknak thawngin nangmah le nangmah ihumhim lawng silloin na innchungkhar le na kiangkam zong hi zawtnak in na luatter khawh hna. Cucaah Covid-19 zawtnak phun hna na pumsa cungah a lang sual ahcun zangfahnak tein vai chek hrim teh.

I chek khawhnak hmun pawl cu: Dallas County um pawl caah Covid-19 zawtnak i chek khawhnak hmun pawl : 2500 Victory Avenue in Dallas le (2) 9191 South Polk Street in Dallas. Lewisville khua um caah Covid-19 i cheknak hmun pawl cu (1) 701 South Stemmons Freeway, Lewisville, TX 75067 le (2) Prime Care Medical Center, 540 Surf St. Lewisville, TX 75067 hi an si. A cheknak man hi free a si. Credit: Salai Z T Lian