World Health Organization (WHO) Director-General Tedros Adhanom Ghebreyesus nih cun “South Korea, Italy, Iran le Japan ram hna cu Covid-19 zawtnak ruangah an dirhmun aṭha lo ngaingai” tiah a chim.

Tedros nih hin hi bia a chim hi Geneva i WHO office daily briefing a ngeihnak a chimmi bia a si. China ram chim lo ah cun South Korea ah hin Covid-19 ngeimi hi an tam bik tiah ti a si i, mi 4,200 leng nih hi zawtnak ṭihnung hi an ngei cang i, athimi hi 22 an um cang tiah theih a si.

Iran ah hin athimi hi 66 an um cang i, zawtnak hrik a ngeimi hi 1,501 an um cang ti a si. Hi zawtnak a ngeimi hna lakah 291 hna cu ṭha tein zohkhenh an si hnuah sizung in chuahter an si cang tiah theih a si fawn. Bawmchantu dingin Iran ah nikhatni ah khan WHO special team hna cu an kal cang. China ti lo ah cun Iran ah hin hi zawtnak in a thimi an tambik cang tiah theih a si fawn.

Nikhatni tiang ahkhan Italy ah hin i zawtnak ruangah a thimi 52 an tling cang i zawtnak a ngeimi hi 2,036 an um cang. Japan zongah zawtnak a ngeimi 960 leng an um cang i, hi hna lakah atam deuhmi cu Yokohama i lawng dinhnak hmun Diamond Princess lawngah a zitmi hna a tam deuh cu an si tiah theih a si.

US ah minung paruk (6) thi an thi cang tiah theih a si. Covid19 ruanga US ah minung paruk an thi cang i US Health official nih thanhnak a tuah. US ah athimi hna hi kum upa deuhdeuhmi an si hna i, US ah hin state 10 in mi 91 nih hi zawtnak hri hi an ngeih cang tiah US Centers for Disease Control (CDC) nih cun a tar ve. Cacawn nikhat ni ah khan hi zawtnak a ngei tharmi hi US ah mi 15 an um ṭhan cang tiah theih a si.