Salai Lairamthang|| 04 Vaupi 29-2020|| US Covid-19 Update: 04/28/2020. Tuchun tiangah US ah a thimi, minung 56803 an si. Nizan ah minung 1284 an thi chap. A zawmi 1010507 an phan. Nizan lawngah a zawmi, 22917 an i chap. August thla thawk tiang ahcun minung 60000 renglo cu an thi kho tiah White House Task Force hna nih April ni 8 ah an ruahdamh nain atu ahcun minung 74073 an thi kho tiah an tuak than. Tutiang ah zawtnak a chek cangmi mi 5.5 milion renglo an si cang. Minute 15 a raumi, Virus icheknak thilri a um cang caah nifatin minung a sing in an chek khawh hna. Antibody testnak zong New York ah an hman cang.

Nizan tiangah adam thanmi dihlak, 139162 an si. Nizan lawngah a dam thanmi minung 20381 an i chap. New York khua lawngah a thimi minung 22623 an si. Nizan lawngah minung 715 an thi. New York khua pakhat lawng i a thimi minung hi US ram pumpi a thimi 35% tluk a si.

US um Laimi zong a zawmi tam ngai dawh kan si. Indianapolis lawngah a tlawmlei in minung 40 cu zawt dawh an si. State dang tete zongah a zawmi an um len. A zawmi nih an chim duh lo caah azaw mi zet theih a har ngai. Washington D.C Area um, Chin miphun chung in Tedim lei kan unau minung 20 an zaw ve. Hakha lei a zawmi kan hngal rih hna lo.

President Trump nih Covid-19 ruangah harnak a tongmi hna bawmhnak stimulus checks pek chap dingah ruahnak a ngei i, white house advisor hna nih an tuaktan lio a si. May thla chungah hin Congress ah an chuahpi than lai i, White house, Senate le House nih an lungtlin ahcun minung pakhat nih $1200 hmuhmi bantuk kha hmuh than khawh a si te lai.

Oxford nih Covid-19 khamhnak vaccine serchuah hmasa bik dawh an si. September thla ahcun kan chuah khawh lai an ti. An sermi an test saling a si. Hmun tampi ah serchuah an i zuam lio hna. Oxford hi ran dawh bik a si. US ah si company ngan bik a simi, Johnson & Johnson le GlaxoSmithKline Plc (GSK.L) nih a ser ve i an test saling a si ve. An testmi a that ahcun FDA nih approve a tuah hnu ah mipi sin ah hman a si te lai. A damnak zong hi a serhmi an um nain FDA nih fawi tein a cohlan hmasa a hau.Gilead company nih a sermi, “Remdesivir si kha testnak an tuah tik ah an ruahning tluk in hma a kal lo caah an lung a rawk ngai ti a si.

Pennsylvania, Virginia le Vermont ahcun dinhdorhnak an tuah cang. Arkansas, Iowa, Nebraska, North Dakota, South Dakota, Utah, Wyoming ahcun stay at home an tuah ti lo. Oklahoma, Colorado, Georgia, South Carolina, Tennessee and Texas ahcun a cheu bang in on hram an thawk. Georgia nih phase one nak sang in on an timh caah President Donald Trump nih spa, salon, tattoo dawr le sanmehnak dawr pawl cu on rih lo dingah ralrinnak a pek hna. Chicago, Boston le Philadelphia hi atu lio ah a zual biknak hmun, hot spot an si.