US Ummi Caah Social Security Benefit

Theihtlei

US Ummi Caah Social Security Benefit: US ummi caah cun Social Security benefit hi a biapi ngaingai mi a si. Asinain aho nih mah kong hi an tial le an chim ka hngal bal lo. US ah riantuan mi poah nih cun, retirement laak tik ah siseh, riantuan khawh ti lo ding dirhmun kan phak tik ah siseh,, na khawnden ruangah I, rian na tuan khawh lo tik ah siseh, kum 65 na si hnu i na ngamdamnak na zohkhenhnak caah Medicare caah siseh, pakhat khat ruang I, riantuan khawh lo ruangah siseh, kum 65 le thla 8 a si cangmi hna nih retirement caah an hmuhmi benefit pawl an si. Mah chungah retirement benefit, disability, medicare,survivors le supplement security income an i tel.

Image may contain: text

Social Security benefit hmuhnak dingah cun work credit 40 ngeih a hau. Buaktlak in Full time in riantuanmi hna nih kum khat chung an riantuanmi kha four credit in tuak piak a si. Cuaah kum 10 chung full time in riantuanmi hna nih Social Security benefit hi hmuh khawhmi a si.

Social Security benefit hi kum 62 na tlin in cun ngah khawh a si. Asinain Kum 66 na si I, Full retirement na laak ahcun 25% tam deuh na ngah lai. Early retirement na lak ahcun na hmuhmi a tlawm deuh lai tinak a si. Bianabia ah, Kum 70 na si I, retirement na laak ahcun thla khat ah $3770 na ngah hnga. Asinain kum 66 retirement na laak ahcun $2861 na hmuh lai I, kum 62 na si retirement na laak ahcun $2209 lawng na ngah lai. Phaisa na hmuhmi a tlawm le a tam cu, rian na rak tuan lio I, na ngahmi phaisa le tuan le tlai I, retirement na laak nih bia a chim te lai. Retirement kum hi na chuah kum nih a ngeih lai caah kum 65, 66, 67 ti in a dang khomi a si.

Cucaah social security benefit tling tein ngah na duh ahcun a tlawm bik kum 10 tal cu full time in riantuan I zuam ding, ngunkhuai le tax tha tein pek ding. Riantuan loin na um I, work credit 40 na hmuh lo ahcun na kum upat tik ah social security benefit vialte ngah lo khawh a si. Atu lio na riantuan mi nih khan hmailei na taar tik ah bia faakpi in a chim te lai. Cucaah atu tein planning tha tein ngeih a hau. Na kum no lio ah rian felfai tein tuan I zuam. Cozah sin ah social security thawhbur tha tein pek I zuam.

Atu ka tialmi hi a tawifiannak in tlamling lopi in tialmi a si. Hmailei ah tlamtling deuh in pehzulh khawh kan i zuam te lai. Keimah nak in a thei deuhmi nih van ka chap piak te hna seh.

Credit: Salai Lairamthang

Leave a Reply