Falam ca in ttialmi si i, Laica he a khah ko caah cattialtu ttial ning tein kan vun tar chin ve. AMERIKA HRILAWKNAK Thuthar (23. 11. 20). Tuizing cu thuthar lawng kan ngan ding: Georgia: Georgia State Govenor cun dan vekin Biden cu nehnak ca a pe zo. Asinan vote an siarsal mikha State dan vekin automatic ih tuah mi a si ruangah Trump Legal Team dil vekin Vote Audit an tuah lo. Khati rizal a suah ding cu theih cia a si. Tu cu Court ah vote zate scan tuahih audit dingin thu an pulut. Vote an audit tikah vote diklo an hmuh pang cun an certify zo mi khal kha an rescind(hnukkir)sal thei. Asinan vote diklo an hmuh lo cun Biden in a neh lanta ding. thuthar um hlan sung cu Georgia EV 16 cu Biden ta ih ruah phawt khala sual lem lo ding.

Pennsylvenia: Biden nehnak ca pe hrih lo dingin Trump Team in an dilnak cu Philidelphia Central District Court thuṭhentu Matthew Brann cun finfiahnak a um lo tiin a hnawlsak. Asinan Trump ih Lwayer Rudy Giuliani cun, “Thutheitu 50 kan neih mi khal in kawhsak lo. Finfiahnak tampi kan pek khal a zoh duh lo” a ti. New York khawpi uktu hlun Rudy Giuliani cun, “Lawyer pakhat dinhmun in Case 300 lenglo ka rak dinpi zo ih kan case hi a nghet tawk a si” a ti. Trump Team cun himi Obama/Biden ih ruat mi Judge parah beiseinak kan nei lo hrimhrim. A can pawtsau kual loih in hnawlsak hi kan lungawi. Appeal court ah kan feh hngal ding. Cun Supreme Court khal kan nai vivo’ an ti. Mizan cawlhni sunah Circuit Court(3) ah appeal an tuah zo.

US Federal Court umdan cu District Court ah judge 678 an um ih Republican lam ruat mi 312 le Democrat lam ruat mi 317 an si. Cumi ihsin Appeal Court(Circuit Court/court of Appallet) 13 ih Judge 179 an um. Republican lam ruat mi Judge 96 le Democrat lam ruat mi Judge 81 an um. Pennsylvenia hi 3rd Circuit ram a si ih Judge 14 lakah Republican President ruat mi Judge 8 le Democrat 6 an si. Michigan le Wisconsin hi 6th Circuit ram a si ih Judge 16 lakah Republican ruat 11 le Democrat ruat 5 an um. Georgia hi 7th Circuit ram a si ih Judge 10 lakah Republican ruat mi 8 le Democrat ruat mi 2 an si. Trump Team pawlih thu thehluh hi Judge in an rak ngai thupit sak lo an ti ṭheu ih Appeal Court talah cun ṭhaten an rak ngaisak dingah ruat sehla.

Cun Court sangbik Supreme Court ah hin Justice 9 an um ih Republican president ruat 6 le Democrat president ruat mi 3 an um. Asinan 2005 kumih Bush ih rak ruat mi Chief Justice John Robert hin a thupi cinah Conservative lam a phatsan ṭheu ruangah an buai thei nasa. Tu khal Amy Barrett an nemhngeh hlante ah Republican lam phatsan in Liberal lamah a vote ruangah Pennsylvenia hi hiti an buainak a si. State dan kalhin State Court in hrilawk hnu ni 3 tiang vote cohlan a siansak cu Republican lamin Supreme Court ah an pulut nan 4-4 in an cohlang lo. John Robert in a phatsan ruangah a si.

Wisconsin khawpipawl ah Vote siarsal an thawk zo. Michigan ah cun Wayne County in Biden an certify lo ruangah certify lo dingih court ih ngen a ṭul hrih lo. Trump Legal Team in Sidney Powell lakah an thairfihlimaw deuh. A san cu a ṭawng mi hrekkhat cu hleifuan tukih finfiahnak le a pe thei fawn lo. ṭhimnak ah Dominion software in Trump vote Million 38 lai Biden a pe tivek..

US Federal Election Commission Chairman James Trainor cu Sky News Australia in, ‘Voter Fraud’(vote diklo) a um na zum maw tiih an suh tikah thil fehdan le umdan ka zoh tikah a um ka zum rori a ti. Russia President Putin cun, “Media-pawl hril mi si lo, US mipi hrilmi President a ra suah tikah zo an si khal le ka pawm leh ding. Cumi a fiang hlan cu thinsau ten ka hngak hrih ding” a ti. Michigan in an certify hrih zik lo. Pennsylvenia cu tuizan certify ding an si ih Court ah block dingih ngen a si. Boruak hin siat lam si maw ṭhat lam si maw a pan hrih lo. Credit: -Lal Lian Zual, Naypyitaw