Trump Hrangah Khua a Vang Thawk Maw? (27.11.20) President Trump hi fighter taktak a si ih diklo le ṭhalo ih a theih cu khatlam party lawng si loin mai lam party khal a hrut tel ṭheu ruangah huatu le duhtu a nei tam thei nasa. Tu khalah Media le Activist ṭihtu Republican hrekkhat cun an phatsan phahphah thang.

Ṭantu a neih mumal lo khalah thudik siih a theih mi ah a dinngheh ṭheu ruangah nehnak a co ṭheunak a si. 2016 hrilawk zik October thlaah khan 1996 kum laiih Hollywood, thlengawknak pindan sung ih a ṭawng a ra suah tikah an do cece. Cutawkah capoh saiin nunau cu sum a um cun a ngah tivek deuh a si. Amai party Republican hruaitupawl khalin hnukdawkaw dingin an ti cece a si kha. Hrilawknak khalah 1% chance pe na, 0% chance pe na an si nan a beidawng loih a neh thotho.

Thuphan thawn Russia bawmnakin a tling tiin hlawn an tumin amai party khalah dinpitu malte lawng an tang cingin a tal khawsuak thotho. Impeachment an tiih President in thil tisual tumpi (high crime) a neih lawngah House I hlawn dingin a ti fang ṭheu mi kha a thiltisual(crime) pakhat hman rel ding thei loin Phone Call pakhat ruangah men Democrat lamin impeachment an tuah nan nehnak a co thotho a si kha.

Tu khal mithiam le media poll zate deuhthaw in Biden 4%-7% an tanternak hmun ah Trump in a neh thluh deuhthaw. Tu khal Prosecutor Lin Wood cun, “Vote diklo kan thenfai thluh cu Trump in nasa takin(landslide) in a neh ding” a ti. Tu hi lamzin a awngaw thlang. Pennsylvenia ah Judge cun Biden nehnak an pek(certified)cia mi cu a kaihtan(halt/block) sak zo. Cutin lamzin a awng vivo ding.

Nevada, Clarke County ah Judge in Republican-pawl cu, “Evidence nan neih mi run thehlut uh” a ti thlang. Hi County ah hin Biden in vote 91000 in Trump a hlawih. Vote ruknak um tengtengih ruah a si. An buainak cu Judge hrekkhat in Media le activist ṭih ah evidence an neih mi khal zohsak duhloin ‘bulhram a nei lo’ tiin an hnawlsak phah ṭheu. Tu cu a danglam thlang. America Conservative Union Chairman Matt Schlapp khal Nevada ih feh hngal a tum.

Wisconsin ah Democrat uknak County-pawlah vote an siarsal ih vote 380 hrawng siar hrelh an hmu zo. Cupawl cu Trump vote-tu an si deuh tlangpi. Group pakhatin Wisconsin in Biden Certified hrih lo dingin court ah an dil. Georgia ih vote audit ding cu State Election Board Commission Chairman Republican mi Secretary of State in a siang lo tlat mai. Court ah an beiaw lai. Hipa hi 2018 ah Trump in a support ruangih tling a si. Election a tidan ah Republican lam an lungawi lo nasa. Corruption ah a tel ve a si hi an ti ceec. Georgia ihsin Senator pahnih khalin Nov.5 daihah khan bang dingin an rak ngen zo.

Media in an ngan ruangah America mipi in Biden nehih pawm thluh zo ah an ruat nan Breibart poll ah Trump support-tu lakah Biden nehih pawmtu cu 3% lawng an si lai. Newsmax TV in Trump hi concede(duai) mai sehla a ṭha maw ti thusuhnak cu mi 190593 an sang ih 1.1% lawngin a duai ṭha an tiih 98.9% in a cem tiang ding nghet dingin an duh.

Republican lamin State Hluttaw an control-nak Pennsylvenia, Michigan le Arizona state Senate-pawl cun Election Fraud thu Hearing an nei ding. Election Board ṭuanvo neitupawl ko in thu an sut ding. Tui zan Pennsylvenia in an thawk dingih Trump khal a ra ve tum. Thutawi simnak khal a nei ding. Court cun Media le Activist thu parah si loin dan vekin lai a rel tikah Social Media le Media pawlih lang tamtam, nehnak an pek si loin diknakih ro an rel ah cun boruak a danglam ṭheh ding! Boruak kan thlir hrih kei cu! Thuthar thlir phahin; Credit: Lal Lian Zual