US Secretary-General Ṭhing Javier Perez de Cuellar A Nunnak A Liam

Thawngpang

UN Secretary-General Ṭhing Javier Perez de Cuellar cu Peru khuapi, Lima ah nithumni ah a nunnak a liam tiah a fapa Francisco Perez De Cuellar  sinin theih a si.

UN Secretary-General Ṭhing Javier Perez de Cuellar hi kum 100 hrawng a si cang i Peru khuapi, Lima ah nithumni ah a nunnak a liam theih a si. Kum 1982-1991 karlak hrawngah UN secretary-General term hnih a tlaitu le UN secretary-general a panganak, Perez hi kum 1980 hrawng i Iran le Iraq an rak i kah-dohnak a chuah lioah remnak ser in palai rianṭuanmi hna lakah zohchun tlak le upatnak bik a si i kum 1988 August 20 ahkhan Iran le Iraq karlak buainak cu a mah thawngin a rak dai kho.

Perez hi kum 2000-2001 ah khan an ram Peru Prime Minister rian a rak tlai bal cangmi a si i an rampi ai-awh in France ah ummi Peru Embassy ah secretary rian a tlai cangmi zong a si. Cun United Kingdom le Brazil ah a ummi Peru Embassy ah rianṭuan bal cangmi zong a si. A nunchung ah hin Peru hleiah vawleipi Democracy a um dir khawh lengmang nakhnga caah rianṭuantu lakah minthang ngaingai pakhat a si.

Kum 2005, July 22 ahkhan Perez hi Heart Attack a ngeih ruangah Paris sizungah thlawpbul a rak si bal cang. Tukum kum hramthawk January 19 ahkhan kum 100 a tlin a si i, Peru Prime Minister aṭuanmi hna lakah a nunkhua saubik zong a si.A ngandamnak a hung ṭha lo ngaingai i caan zeimawzat chung zohkhenh a si hnuah March 4, 2020 ahkhan an ram khuapi Lima i a khuasaknak inn ah a thi tiah, a fapa Francisco Perez De Cuellar nih a chim. Tuni ah Perez ruak vuinak caan cu Peru Foreign Ministry headquarters ah caan hman a si lai. Zeiruang bik ah dah a thih ti cu langhter asilo nain, a ngandamnak a ṭhat lo caah le amah hi upa lei a si tikah a derthawm deuh ruangah a si tiah ruahbik le zumh bikmi a si.

Leave a Reply