US Ramchung Ah A Thimi An Karh Chin Lengmang Minung 7800 Renglo Bak A Si Cang. Ngaihchia ngaingai a si ko. Vawlei nih PA bantuk in zohmi United States rampi cu coronavirus ruang ah a thimi nikhat hnu nikhat in an karh chin lengmang ko. Hi kong ah ruahawk a um ngaimi pakhat cu coronavirus a chuahhnu ah hin China minung US ah a kalmi hi minung 40,000 renglo bak an si e ti a si.

Centers for Disease Control and Prevention hna nih ram mipi hna cu zawtnak an ngei maw ngeilo ti cu biatakte in hneksaknak an tuah cuahmah. A tu tiang ah US ramchung lawng i hi zawtnak a ngeimi hi minung 278,458 renglo an si cang. Vawlei pumpi ah hi zawtnak in a zawmi dihlak theih khawhtawk hi minung 1.1 million renglo bak an si.

US New York State lawng bak ah hin hi zawtnak ruang ah minung 3,500 renglo nunnak a liam cang. Mithiam hna nih an tuak ning ah cun hi hnu zong ah US ah hin a zawmi le a thimi an karh chin lengmang ko rih lai, tiah an ruah.

Hi bantuk in coronavirus a ngei tiah theih khawhmi hmanh hi vialte an lio ah hin theih khawh rih lomi zong tampi an um rih lai tiah zumh a si. Ram cheukhat hna nih cun a sining taktak in an thanh lo kho ko tiah ruah a si rih.

Hi zawtnak ruang ah hin vawlei pumpi huap tuak khawhtawk ah minung 59,900 renglo an thi cang. Cu lio ah minung 226,000 renglo cu an dam tthan cang tiah Johns Hopkins University, Center for Systems Science and Engineering hna nih an chim. Ref: The New York Times