US Ram Hi A Him Chin Lengmang Ti Lo. Texas Ah Meithal Kahnak A Chuak Tthan

Nizan Sept. 1,2019 ah khan US- Odessa, Texas state ah minung pakhat nih meithla i put in minung 5 a kah/thah hna i, a dang minung 21 nih hliam an tuar. Hliam tuar hna hi Odessa Center Hospital ah 14 zohkhenh colh an si. Odessa hi Midland -in mel 23 hrawng hla ah a um i, Dallas khuapi in 483km hla a si.

Kah mi hna lakah Police zong an i tel i, minung pathum nih hliamhma an hmu tiah chim a si. Zei ruangah hi lainawnnak hi a tuah timi theih a si lo i, Police nih lainawng tu pa hi Cinerary Movie Theatre pawngah an thah colh ve i, Mingo (White) kum 30 hrawng a si,”tiah an chim.

Hi kong he pehtlaiin Police lei biachimtu Gerke nih cun hi kongah thil um tu ning hlathlai lio a si, tiin mipi hna nih Highway ah chuah rih lo an duhnak cu a chim. Sinain lainawng tu pa hi thah a si cang i, a dai ko lai tiah an chim ve.

Mah lainawng tu pa nih hin US Postal Service motor a fir tiin a chim mi an um lio ah tthenkhat nih cun Shopping Mall ah a rak lut i atu bantuk in thah nawnnak a tuah colh hi si,”tiah an chim ve. Kan theih bantuk in tuan deuh zongah khan Texas state El Paso ah minung 22 kah/thah an si, Dayton-Ohio state zongah minung 9 kah/thah an si fawn. Naihrawng hi US ah i kahnak hi a tam taktak.

Odessa hmun i, thil a cang mi kongah President Trump zong thil sining ttha tein chimh si i, “FBI le Law Enforcement hna nih ttha tein zohfelnak an ngaih cuahmah lio a si.