President elect Joe Biden nih coronavirus nih a hrawh mi US economy tharchuahnak ah stimulus plan dollar 1.9 trillion timhtuahnak a neih mi cu a van phuan. Hmaizarh ah Joe Biden hi US president a tuan cang ding asi. Congress nih a cohlan pi asi ahcun Americans mi le sa asimi poh nih bawmhnak dollar 1400 cio an dawng kho lai tinak asi. Relief proposal a sermi ah hin virus dohnak ah dollar 415 billion hlei ah small business hna bawmhnak ah dollar 440 billion timhtuah asi fawn.

Democrats Biden nih US mipi 385,000 nunnak a latu pandemic cu tei ding hrimhrim in ai kam. Nikum i campaign a neih lio zongah Republican president Donald Trum nak in tha deuh in virus doh ding in a kamh cang hna. US ahcun khuasik lio ah coronavirus a kai mi an karh chin lengmang i, nichiar te in a kaithar 200,000 hrawng lengmang an um tiin an tuak dawmh i nichiar in minung 4000 hrawng nih an thihpi lengmang in tuak dawmh asi fawn.

Joe Biden nih a umnak Wilmington, Delaware in biachimnak a neihnak ah minung nih harsatnak faak tuk in a ton cuahmah lio ah daithlan in caan phelrel kho kan si loh. Kan ram ngandamnak dirhmun ttihnung in a um tiah chim in a rannak in cawlcangh kan hau i, a tu in kan thok colh a hau tiin a chim. Biden nih Americans mikip vaccine peknak ah dollar 20 billion chiah a timh i, mah nih hin mipi dihlak vaccine pek le hmun kilkhawr deuh i mibile units hna zong a huap chih dih. Trump administration lio in vaccine pahnih pawm i kalpi asi cang nain rang deuh in pekchuah kalpi a hau tiin health officials hna nihcun an chim.

United States ah vaccine pekchuah ning a tha loh tiah chim in Biden nihcun president asinak in ni 100 chung in 100 million vaccine pek manh dingin a timhtuahnak kong zong a chim chih fawn. Test kalpinak ah dollar 50 billion timtuah fawn in thal chungah school hawn manh asi khawh nak dingah dollar 130 billion chiah a timh fawn. Mah pin ah hin contract tracing kalpi nak dingah public health workers 100,000 chawr timh asi fawn.

US ram pum ah rianngei lo million 11 hna cawi dawmhnak dingah tuzarh ah jobless benefit an dawn dollar 300 cu 400 ah kaiter timh asi fawn. Hi nihhin tukum September thla tiang a awh lai. President elect nihcun Congress hna cu federal minimum wage suimilam pakhat ah dollar 15 ti dingin a hal fawn lai. Republicans hna nihcun US nihcun pandemic ruangah leiba trillion renglo a neih cangmi neih chap peng ding cu an duh lai lo tiah ruah asi. A sinain Democrats hna nih Congress chamber hnih an uk cang ruangah timhtuah mi hna cu an kalpi khawh ko lai tiah ruah asi.