President Trump le US Federal cozah ah mithiam cungcuang a simi Dr. Anthony S. Fauci cu coronavirus kong ah mipi theih in biaruahnak an ngei. Dr. Anthony S. Fausi nih a chimmi cu rampi hi tuan deuh ah kan khaar (shut down) paoh le coronavirus chung in nunnak tamdeuh kan chanh manh lai tiah a chim. A sinain President Trump nih Tweeter in lehnak a ttialmi cu a tu cu Fauci chimmi hi cohlan caan a si rih loh ti in American mipi minung 22,000 renglo thihnak kong ah soiseltu hna nih an soiselnak bia pawl cu a cohlang lo.

Dr. Fauci nih nizan Pathianni i CNN sin ah a chimmi cu cozah biakhiahnak cung ah hin thil tampi ai hngat. March thla canceo ah silo in February thla thok te khan inn um viar ding in ti rak si seh law nunnak tampi kan hei khamh phum ko hnga. Ka chim duhmi cu, nan theih cio bantuk in le thil kal tawn ning in kan chim a si ah cun a tu bantuk in tuahmi pakhat khat tuan deuh in rak ngei u sih law nunnak tam deuh kan khamh ko hnga tiah a chim. Cucu theih cio bantuk in a ho hmanh nih al awk a tthami a si lo. A sinain cu bantuk biakhiahnak cu a har taktakmi a si.

A hramthok te in zei paoh phih dihnak nawl rak ngei u sih law cu nih cun thil zeimaw cu a thlen ko lai, tiah a chim chih. A sinain thil zei paoh phih dih cu hei si taktak seh law cu hnu lei in thil tampi nawr tu le namtu a um tthiamtthiammi a si. Hi kong hi tuah deuh zong ah khan President Trump le Dr. Fauci hi an rak i ruah bal cang.

Nizan Easter Sunday lawmh caan ah Khrihfa million tampi hna nih an mah le an chungkhar le hawikom pa hnihthum cio he lawng caan hman a si tik ah President Trump cu a thin lawng a hung ko. Nizan kha cu a thin hunnak kong le coronavirus a dohnak kong ah soiseltu hna nih bia faak faak in an tinak pawl lehnak ah caan tampi a hmang. Hi zawtnak ai thoknak China cung nak hmanh in World Health Organization, President hlun Barack Obama, Governor pawl, Congress, Democrats le thawngzamhtu (news media) pawl hna cung ah a thin a hung deuh. Ref: The New York Times