Vawleipi nih a cuanh cuahmahmi, US President thimnak cu tuni November 3,2020 ah thim a si cang lai. US President thimnak ahhin US ramchung mipi lawng hmanh si loin vawlei cung ram kip nih cuanh cio an si. Aruang cu President an thimmi hna nih ram pakhat le pakhat tlaihnak tiah a va ṭhihkhaih khawh caah vawlei pi nih an cuanh hnanak a si.

US political system hi party ngan pahnih, Republican party le Democratics party nih a ukmi le ahruaimi a si. President a si cangmi hna zong hi party pahnih chungahhin pakhatkhat an chungtel in an um peng rih hna ti a si.

Republican party, Grand Old Party (GOP) tiah theihmi hi party hi sonservative political party a si i, tukum an party presidential candidate cu US President a si cuahmahmi Donald Trump hi a si. Rural America ah amah uartu le thazaaang petu an tam khun.

Democratic hi Liberal political party a si i an presidential candidate cu Joe Biden a si i Joe Biden hi kumpi kum 8 chung US President ṭhing Barack Obama tangah Vice President dirhmun a rak tlai cangmi a si. Democratics Party cu Urban America ah a dirkamhtu hna le thazaang petu an tam khun ve.

Tukum hi US President aa cuhmi hna hi an pahnih ning tein upat lei an panh veve cang. A kum in cun kum 70 cung kai veve an si cang. Atu US President dirhmun atlai cuahmahmi Trump hi kum 74 a si i, Biden hi kum 77 a si. US President thimnak cu electoral collge vote hmangin thim an si lai.

Electoral College vote

 

US President a thimtu, Electoral College ahhin vote 538 a um i, vote 270 hmuh hrimhrim a hau. Electoral Collge i state kip vote an ngeih khawhning cu an state mipi tlawm le tam zat in tuah a si. Mipi vote thla ve ko hna hmanseh, mipi vote, popular tiah auhmi hi ka i vote a hmu tam deuhmi paoh an tling peng hlei lo. Kum 2016 i thimnak ahkhan Democratics party in Hillary Clinton cu aa cuh pi mi Republican party Donald Trump nakin Popular vote a hmu tam deuh. Asinain, Trump nih Electoral collge vote tam deuh a hmuh caah US President ah thim a si.

Resulh phuan caan

Vote thlakmi vialte rel dih ding ahcun caan saupi ahau ve. Asinain, President thar thimnak cu Electoral College vote ah aa hngatmi a si ruangah vote an thlak a thaizing ah theih khawh colh zong a si tawn.

Kum 2000 lio i thimnak ahkhan, result ( vote a chuak zat) fawi le bai in an theih khawh lo caah Supreme Court a hun i thlak hnu lawngah vote thlakmi zat result fian khawh a si. Hi i thimnak ahhin Republican candidate George W Bush le Democratics candidate Al Gore hna hi a cuhmi an rak si.

An vote hmuhning hi an i khingkhang ngaingai. Asinain an vote cu Florida electoral college vote ah a hngatmi a si caah cu ruangah cun a thar in vote rel ṭhan dingin hal ṭhannak tiang a chuak. Asinain, Supreme Court a hun i thlak i, Florida electoral college vote 25 cu Bush an pek. George W Bush cu a dihlak in vote 271 ahmu i President ah thim a si. Al Gore cu Popular vote (mipi vote) tam deuh a hmu nain, a tling hlei loh.

President thar lak caan

President thar hi kum thar January 20 (Pathianni as i ahcun January 21 ah) Washington DC i Capitol building ah ah lak le luhpi a si. President laaknak le don caan an hman dih hnuah President thar a simi nih White House i a office ah a um colh lai, a tlaih colh lai.

President thar lak a si hlan ah Vice President cu biakamnak ngeihter hmasat a si i cu hnuah President thar cu lak le don a si. President thar cohlannak le don lawmhnak cu Joint Congressional Committee on Inaugural Ceremonies (JCCIC) nih a tawlrel dih tawn. President thim thar mi nih a kut in Bible cu i tlaih in biakamnak ngeihter a si tawn. US President thar Bible i put in biakamnak a ser lomi hi pathum hrawng an um cang. Chirhchan: Vanglaini

Salai Lairamthang: Donald Trump Policy le Biden policy hi cuaithlai chunh ulaw, policy tha deuhmi vote thla te ko uh.

Biden policy:
1.Nau thah, nau hrawh, nau thlak. 2.Police pawl fund pek ti lo ding. 3. Meithal ngeih khawhnak phung hrawh ding. 4. Phung ning lo in ramdang mi luhter. 5. Ngunkhuai tam deuh in laak ding. 6. US ralkap thazawng zorter ding. Budget zong tthumh ding. 7. Cozah nih phungphai vialte tlaih i cozah a si lomi poah rengh chinchin ding.

8. Mi zei poah thimfung thlakter ding, citizen he zen lo he. 9. Cozah nih cawn chommi ram ah ser. 10. Sipuazi phih kharnak tuah zong poi lo. 11. Cozah thazang thawnter i private thazang pek lo. 12. Nu le nu, pale pa thitumhnak, Same sex marriage pom. 13. Socialist ram ah ser. Cozah nih zei poah ah i thlak i tlaih dih.

Trump Policy:
1. Fale cu Pathian pekmi an si caah an nunnak zuah ding. 2. Police cu a kan vengtu an si caah phaisa pek ding. 3. Meithal cu kan ivennak a si caah meithal ngeih khawh ding. 4. Ram pakhat kan si caah ram himnak caah ramri tha tein ven ding. 5. Phungning tein ramdang mi lunak visa pek in luhter ding. 6. Ngunkhuai tlawm deuh laak i, ramdang i a chuakmi company US ah luhter ding.

7. Ralkap cu rampi vengtu an si caah ralkap thazang thawnter ding. 8. Small business timi sipuazi hme tete tuahmi thazang pek ding. 9. Thimfung thla khotu voter ID ngeimi lawng nih thimfung thlak ding. 10. Riantuan mi poah thazang pek i, anmah kutke in cawmnak thazang pek ding. 11. Rampi sipuazi phihkhar lo ding. 12. Cozah hmeter i, institution le private sector thawnter ding. 13. Cozah temtawnnak zorter ding. 14. Capitalism timi politic le economic ah cozah renghmi si lo in zalong tein private le a ngeitu hna kha thazang thawnter ding.

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtleih ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Cun, Chin World News Evening kan ṭialmi thawngpang paoh sml 24 a tlin hlan ah mizei hmanh nih copy-paste tuah kan siang lo. Na relmi thawngpang hna hi midang nih an rel khawh ve nak hnga aṭha tiah na ruahmi a um ahcun share in rak kan bawm ve. Kan ca a kan rel piaktu nan dihlak cungah kan ilawm. Upatnak he Admin