US Nih Taiwan Sinah F-16 jet fighters Zuar Ding Zat An Phuan. China A Lung Rethei Zeidah Chim?

US State Dept nih Taiwan sinah F-16 jet fighters 66 bak, US$ 8 billion man bak zuar dingin biachahnak an tuah cang. Mah hriamnam zuarnak nih hin Sino-US pehtlaihnak a hrawh khawh men tiah zumh a si.

Mah lawng si loin a luancia ah khan Trump Admin lei nih Taiwan sinah raltuknak tank M1A27 Abrams zeimawzat le surface-to-air missile hna cu, US$ 2.2 billion man zuar dingin a rak ti fawn cang. China a thinhung i, “Taiwan cu China ram pakhat a si caah hi bantukin hriamnam an zuarmi nih theipar ttha a chuahpi lai lo” tiin, US thil tuah cu fak piin a soisel ve.

Chinese Foreign Ministry biachimtu Geng Shuang nih cun hi hnu zongah “Taiwan cu China ram pakhat a si peng lai, a herh ahcun China thazaang hmangin Taiwan hi a doh lai,”tiah a chim ve.

Hi kongah nawlngeitu nih US nih Taiwan hriamnam zuar kan timhmi cu raldohnak lei peng si loin, “political, military advance le economic lei tthanchoternak dingah a si, tiin China soiselnak le dohnak cu zei ah an relpiak lo i, Taiwan sinah hriamnam cu zuar an timh tthiamtthiam.