Admin||05|Biangreithlep 09|2020||US nih China, Wuhan Institute of Virology Laboratory in pulrai zawtnak Covid-19 hi an thawkmi le a karhmi a si tiah a chim i, China nih hi kong he pehtlai in thil tampi a phuan duh lomi a thuhmi a um tiah a chim chap. Asinain US nih a puhnak le a lunghrinhnak cu China nih zeihmanh a rel lo ai pheh chih ve.

Arizona i kal lioah White House pawng i thawngzamhtu sinah Trump nih “Caan rau lo te ah US nih hi pulrai zawtnak covid-19 a rak chuahning le ai semning taktak a chim phuante lai. Kanmah nih kan duh bikmi cu zei thil paoh hi a sining le mipi theih in kalpi le rianṭuan hi kan duh bikmi a si,” tiah a chim.

“Hi pulrai zawtnak Covid-19 ruangah vawleipi nih lungreitheihnak phunphun le harsatnak faak tuk a tonmi bantuk thil hi hmaleiah a um ṭhan ti lo nakhnga le a um ti lo nakhnga hi a karh cuahmah le mi tampi nunnak a latu Covid-19 kong hi fianghlang tein China nih a chim phuan a herh,” Trump nih cun a chim chap.

 

Vawlei cung thiamsang tampi hna nih an ruahdamh in an chim ve mi cu hi zawtnak hi Wuhan market sa zuarnak in ai thawkmi a si ko ti hi a tlangpi in a zumhmi a si. Cun, an chim rihmi le hihi a si kho tiah an ti rihmi cu hi zawtnak hi saram sinin minung nih an i laakmi, a fawinak in chim ah cun saram nih minung a chawnhmi hna a si ko lai ti hi an zumh bikmi cu a si. Tuchun ni tiangah US ah hi zawtnak a zawmi hi 1,318,504 Millions an tling cang. Cu lakah an damhmi ṭhanmi hna hi minung 221,919 an si cang i a thimi hi 78,492 an si cang.