US- Mi Bu Umnak Hmun Ah Meithal Kahnak A Chuak, 20 Nunnak A Liam, 26 Nih Hliam An Tuar

Nizan tlai ah khan US El Paso, Texas i mibu an umnak hmun ah meithal kahnak a chuak i minung 20 nunnak a liam i, hliam 26 nih an an tuar. Greg Abbot, Texas Governor, FBI le Police nih mi thattu Patrick Crusius (21) cu an tlaih cang i, meithal a hman mi hi AK-47 style deuh an si. amah tein Police kut ah a pe.

Mah thil a cannak a ruang bik cu Hispapic-pawl huatnak ruang le Christchurch, New Zealand hmun i Muslim Mosque kah nak he aa khat tiin an chim cio. Atu hrawng cu US ah “Racist” timi biafang a lar ngai i, vunrang tthenkhat zong nih Latin America ram in US ah phungning lo le dan pangai bantukin a pem lutmi an tamtuk tikah duh lo nak le remlonak a zual ngaingai. Mah ruangah (anti-Hispanic extreme views) tiang an ngaih phahnak a si.

Hliamhma a tuarmi tthenkhat hi Del Sol Medical Center, University Medical Center of El Paso le El Paso Children Home ah zohkhenh an si. A thimi lakah hngakchia thla 4 mi, kum 2 le kum 9 mi an i tel.

Patrick Crucius hi Allen, Dallas khuapi area, chung um in El Paso in aa hlattuk lomi a si. Lainawnnak hmun hi El Paso Shopping Mall ah a si. El Paso khua ah hin minung 680,000 an um i, West Texas-Juarez, Mexico he ramri an si. The Wild West chan lio, Billy the Kid chan lio zongah Texas le Mexico hrawng hi meithal kahnak le thah nawnnak a tam kunnak hmun a si.

Cielo Vista Mall meithal kahnak a chuah lio ah hin minung 1000-3000 tluk an um i, rianttuantu 100 tluk an um tiah chim chih a si. El Paso hi Rep. Beto O’Rourke (Democrat), atu lio US President cuh aa timmi umnak khua si i, Primary Election caah campaign ah a buaituk ve nain an khua ah nunnak a liam mi chungkhar hna hnemh dingin tlun colh a tim ve.