Cozah Sin Tax, Ngukhuai Pe Lomi Caah Bawmhnak Um Kho. US ah phung ning tein a um i, ngunkhuai tax a pe bal lomi caah a tanglei link hi hmet ulaw information an in halmi poah tial pak ding a si lai. Cozah [ IRS] nih bawmhnak nan qualify le qualify lo cozah nih an in chek piak hna lai.

Pek tlak na si ahcun minung pakhat bawmhnak $1200 na hmuh ve lai. 2018/2019 caah tax a pe cangmi caah cun tuah a hau lomi a si. Laimi cheukhat cu sushi riantuan i, tax pek loin cash in riantuan mi tete kan um. Mah pawl caah a that hnemnak a um men lai tiah ka ruah. Hihi rak meh piak law information an halmi tial piak ding pawl a si lai.

Thawngpang dang rak rel chih: US Covid-19 Update: 04/14/2020. US mipi nih social distancing tha tein an zulh caah a zawmi le a thimi cazin zoh chih in peak date kha an thlen ve i, kan hnu Friday kha a sang bikmi peak date a si. Tuzarh cun a thimi, a zaw tharmi la zor lei an pamh lai tiah ruah a si.

Tuchun tiangah US ah a thimi, minung 23644 an phan. Nizan ah a thimi minung 1489 lawng an si cang. A zor deuh ngai cang. A zawmi 587173 an phan. Nizan lawngah a zawmi minung 26740 lawng an i chap cang. Nikhat hnu nikhat a zawmi an zor cang. Tutiang ah zawtnak a chek cangmi 3 million renglo an si cang. A dam thanmi 36948 an si. Nizan lawgah a dam thanmi minung 4314 renglo an i chap ve. Athi mi a tam deuh cu minak pawl an si. A thimi tam deuh cu zawtnak dang a ngeih chihmi hna mi tam deuh an si.

White House Coroanvirus Task Force chungtel Fauci cu a bia hnu le hmai a kalh deuh ti a si. February ni 29 ah a rak chimmi cu “mah zawtnak hi phan ding a si lo, US mipi caah tihnung a si lo’ tiah a rak chim. Asinain Sunday ah CNN he interview ah a chim thanmi cu tuante in rak i khar usih law kan rak him deuh lai tiah a chim than tik ah Trump a dirkamhtu pawl a ai a puanh hna. Asinain nizan press conference ah President Trump nih Dr.Fauci cu fire ka tim lo” tiah a chim. President Trump nih business on than dingah, zawtnak lei thiamsang hna nih ruahnak pekmi chung in biachahnak ka tuah te lai a ti. May thla chungah hin business zeimawzet cu an on than lai tiah zumh a si.

Cozah nih Coronavirus bawmhnak a tuahmi, minung pakhat ah $1200 le fa pakhat ah $500 chap dingmi bawmhnak thaizing ah nan bank account chungah thun hram an thawk cang lai caah nan kum dih tax refund i direct deposit a tuahmi mi minung 80 million bank account ah a lut cang lai. Nu le va le fa pahnih a ngeimi nih cun US$ 3400 a lut lai. Asinain mail in kuat dingmi pawl cu April 24 hnu lawngah kuat khawh an si lai tiah an chim. White house coronavirus task force nih an tuakning ah August thla ni 4 tiang ah khin, a thimi dihlak minung 81,766 kan phan kho tiah an ruahdamh. Tuan deuh i an tuakning ahcun minung 100000 in 240000 tiang kan thi kho tiah an rak chim.

President Trump nih small business pawl bawmhnak caah US$250 billion bawmhnak tuah an duh nain Democrats pawl nih small business bawmhnak he a pehtlai lomi, sizung, sibaw, nurse le food stamp lei ah bawmhnak tam deuh in telh chih an duh caah kap hnih lungtlinnak a ngei kho lo. Republican pawl nih bill kan chuahpi mi hi small business caah adang tein tuahmi bawmhnak a si caah a dang bawmhnak he kan cawhmeh kho lo an ti.

Vawleicung ah zawtnak ngeimi tam bik cu le a thimi tam bik cu US kan si cang A zual bikmi khua cu New York a si i, minung 10056 an thi. Nizan lawngah New York khua ah minung 671 an thi. A thimi minung cazin a tum chin lengmang cang.

Atu lio ahcun sibawi, nurse le healthcare riantuantu pawl cu ralkap nak in bochan deuhmi an si. US mipi himnak caah ral a tumi an si. US rampi chung a zawmi le a thimi, 40% cu New York khuami an si. New York hi vawleicung khualtlawng a tam biknak khua a si caah a zual khunnak a si an ti. Covid-19 ruangah US ah rian ngei lo a sawkmi million 17 renglo an si cang. Credit: Salai Lairamthang